महोत्तरी । घरेलु हिंसामा परेकी नेहा चौधरीले जिल्ला अदालत महोत्तरीमा मुद्दा दायर गरेकी छन् । ग्रान्डी अस्पतालमा समेत काम गरेका श्रीमान् डा. पंकज चौधरीविरुद्ध उनले घरेलु हिंसा र दाइजोविरुद्धका दुई मुद्दा दायर गरेकी हुन् ।
महोत्तरीको औरही १ घर भएकी नेहा र सोही जिल्लाको रामगोपालपुर ५ घर भएका पंकजले तीन वर्षको प्रेम सम्वन्धपश्चात पारिवारिक सहमतिमा गत फागुनमा विवाह गरेका थिए । विवाहको केही समयदेखि नै दाइजो कम भएको निहुँमा नेहाकोे श्रीमान् र परिवारले शारीरिक तथा मानसिक यातना दिन सुरु गरेका थिए । श्रीमानको कुटपिट र यातनाबाट घाईते भएकी नेहालाई गत असोजमा माइतीले उद्धार गरेर अस्पताल पुर्याएका थिए ।
नेहाको परिवारका अनुसार नेहा र पंकजको विवाहमा ६२ लाखको चेक, २० लाखको सुन तथा ५०/६० लाख चाँदीका गहना दाइजो दाईजोमा दिएका थिए । आफ्नो औराही बजारमा भएको घर र जग्गासमेत बेचेर परिवारले नेहाको विवाह धुमधामसँग गरिदिएका थिए ।
नेहाका श्रीमान्ले भने उल्टै उनीविरुद्ध झगडालू र मानसिक समस्या भएको भन्दै डिभोर्सको मुद्दा दायर गरिसकेका छन् । तर, नेहाले आफूमा त्यस्तो कुनै समस्या नरहेको बताएकी छन् ।
पंकजले काठमाडौंका दुई अस्पतालमा जागीर गुमाएका छन् । उनी टोखास्थित ग्राण्डी अस्पतालमा जनरल फिजिसियनका रूपमा काम गरिरहेका थिए । उनको घरेलु हिंसासम्बन्धी समाचार बाहिर आएलगत्तै अस्पतालले पंकजलाई सेवाबाट बर्खास्त गरेको हो ।
