काठमाडौं । भारतले तटवन्ध निर्माण गर्न महाकाली नदीको धार परिवर्तन गरेपछि दार्चुलामा स्थानीयले बिरोध गरेका छन् ।
भारतले पूर्व सहमति बिपरीत तटबन्ध निर्माण गरेपछि स्थानीय बासिन्दाहरूले सांकेतिक रुपमा बिरोध गरेको प्रमुख जिल्ला अधिकारी दीर्घराज उपाध्यायले जानकारी दिनुभयो । उहाँले भन्नुभयो, ‘भारतले आफ्नो क्षेत्रमा तटबन्ध बनाउने क्रममा महाकालीको धार परिवर्तन गरेपछि स्थानीय बासिन्दा त्रसित भएका छन् ।’
असारमा महाकालीको बाढीले दार्चुलामा क्षति पुर्याएको थियो । पुनः नदीको धार परिवर्तन गर्दा नेपाली भूमिमा कटान हुन सक्ने भन्दै बिरोध भएको हो । प्रमुख जिल्ला अधिकारीले भन्नुभयो, ‘काम सुरु हुनु भन्दा अघि भारतीय पक्षसंग एक खालको सहमति भएको थियो तर सहमति बिपरीत काम गर्दा स्थानीय आक्रोशित बने ।’
स्थानीयको बिरोध पछि पुनः भारतीय पक्षसंग कुराकानी गरी समस्या समाधान गरिएको जानकारी उहाँले दिनुभयो । अब निर्माण कार्य गर्दा नदीलाई बीचमा पारेर गर्ने सहमति भएको छ ।
