काठमाडौँ । कतारमा जारी फिफा विश्वकप फुटबल अन्तर्गत समूह ‘ई’को खेलमा स्पेन र जर्मनीले बराबरी खेलेका छन् ।
भर्खरै सम्पन्न खेलमा दुबै टिमले एक–एक गोलको बराबरी खेल्दै अंक बाँडेका हुन् । स्पेनका लागि अल्भारो मोराटाले तथा जर्मनीका लागि निकलास फुल्कर्गले गोल गरे ।
खेलको छैटौं मिनेटमा ड्यानी ओल्मोले प्रहार गरेको बललाई जर्मनीका गोलकिपर म्यानुएल नोएरले उत्कृष्ट बचाउ गरे । यस्तै, ३६ औं मिनेटमा स्पेनका फेरान टोरेसले प्रहार गरेको बललाई जर्मनीका जमाल मुसियालाले डिफेन्ड गर्दै विफल पारे ।
खेलको ४० औं मिनेटमा जर्मनीका एन्टोनियो रुडिगरले गरेको गोलले मान्यता पाएन । भीएआरको सहायताले उनले गरेको गोलले मान्यता दिलाएन । उनी अफसाइड रहन पुगे ।
५६ औं मिनेटमा जर्मनीका जोसुआ किमिकले प्रहार गरेको बललाई स्पेनका किपर युनाइ सिमोनले बचाउ गरे । ६१ औं मिनेटमा बैकल्पिक खेलाडी अल्भारो मोराटाले गोल गर्दै स्पेनलाई सुरुवाती अग्रता दिलाए ।
७३ औं मिनेटमा जर्मनीले बराबरी गर्ने अवसर गुमायो । मुसियाला स्पेनका किपर सिमोनसँग वान टु वान रहेर पनि गोल गर्न सकेनन् । ८३ औं मिनेटमा फुल्कवर्गले गोल गर्दै जर्मनीलाई हारबाट जोगाए ।
बराबरीसँगै स्पेन २ खेलबाट ४ अंकसहित तालिकाको शीर्षस्थानमा रहँदा समान खेलबाट १ अंक जोडेको जर्मनी पुछारमा छ । यस्तै ३ अंक रहेको जापान र कोस्टारिका क्रमश दोस्रो र तेस्रो स्थानमा रहेका छन् ।
