काठमाडौँ । अघिल्लो प्रतिनिधिसभा निर्वाचनमा दयनीय बनेको राष्ट्रिय प्रजातन्त्र पार्टी (राप्रपा) यस पटकको निर्वाचनमा सुखद अनुभूति गर्ने अवस्थामा पुगेको छ ।
२०७४ सालको निर्वाचनमा झापा निर्वाचन क्षेत्र नं ३ बाट मात्र निर्वाचित भएको राप्रपाले २०७९ को निर्वाचनमा सानदार नतिजा ल्याएको छ । अघिल्लो निर्वाचनमा पार्टी अध्यक्ष (त्यतिबेला होइन) राजेन्द्र लिङ्देनले नेपाली कांग्रेसका प्रभावशाली नेता कृष्णप्रसाद सिटौलालाई पराजित गरेका थिए ।
ताजा मत परिणामअनुसार राप्रपाले प्रतिनिधिसभा सदस्य निर्वाचनमा प्रत्यक्षतर्फ ७ सिटमा विजय हासिल गरिसकेको छ । अघिल्लो निर्वाचनमा समानुपातिकतर्फ आवश्यक थ्रेसहोल्ड पुर्याउन नसकेर राष्ट्रिय पार्टी बन्न असफल भएको यस पार्टीले जारी निर्वाचनमा अहिलेसम्म ५ लाखको हाराहारीमा मत ल्याइसकेको छ र राष्ट्रिय पार्टी बन्ने निश्चित भएको छ ।
समानुपातिकतर्फ पनि करिब ७ देखि ८ सिट आउने अवस्था हुनु राप्रपाका लागि उत्साहजनक नतिजा मान्न सकिन्छ । विशेषतः लिङ्देनले पार्टीको बागडोर सम्हालेपछि राप्रपाप्रति मतदाताको आकर्षण ह्वात्तै बढेको पाइएको छ । उनले राप्रपाको पुरानो पुस्ताको लिगेसीलाई नयाँ पुस्तासँग जोड्दै पार्टीलाई एजेन्डाकेन्द्रित तथा सिद्धान्तनिष्ठ बनाउन कसरत गरे । साथै ‘भ्रष्टाचार गर्नु भनेको आमाको रगत खानु सरह हो’ भन्दै उनले नेपालको भ्रष्टाचारले विकृत राजनीतिलाई सदाचारको प्रवाह गराइदिए ।
पुरानो नेतृत्वबाट दिक्क भइसकेका कार्यकर्ता र जनता पनि युवा पुस्ताका लिङ्देनको नेतृत्वमा पार्टी अगाडि आएपछि उत्साहित भएका छन् । साथै यसै अवधिमा उनले युवा पुस्ताले रुचाएका ज्ञानेन्द्र शाही र विवेकशील साझा पार्टीका पूर्वअध्यक्ष रवीन्द्र मिश्रजस्ता व्यक्तिलाई पार्टीमा भित्र्याएर पार्टीमा नयाँ सञ्चार जगाइदिए ।
त्यस्तै उनले ‘राजसंस्था’ र ‘हिन्दू राष्ट्र’ को एजेन्डालाई अगाडि बढाएर नेपाली राजनीतिमा नयाँ तरङ्ग ल्याइदिएका छन् । अझै पनि नेपाली जनताको एउटा तप्का यी दुई एजेन्डालाई रुचाउने स्थितिमा छन् । पार्टी अध्यक्ष बन्ने होडमा पराजित भएका कमल थापाले राजसंस्थाको एजेन्डा त्यागेपछि यो तप्काको सहानुभूति राजेन्द्रले पाए ।
२०६२/६३ को दोस्रो जनआन्दोलनले राजसंस्थालाई फ्याँकी मुलुकलाई गणतन्त्र बनाएपछि २०६४ सालमा भएको पहिलो संविधानसभा निर्वाचनमा राप्रपाले प्रत्यक्षतर्फ एक सिट पनि जितेको थिएन । उसको समानुपातिकतर्फ ८ सिट आएको थियो ।
त्यस्तै दोस्रो संविधानसभा निर्वाचनमा प्रत्यक्षतर्फ ३ र समानुपातिकतर्फ १० गरी कूल १३ सिट आएको थियो । तर नयाँ संविधान बनेपछिको २०७४ को संसदीय निर्वाचनमा राप्रपाको स्थिति लाजमर्दो अवस्थामा पुगेको थियो ।
पार्टी अध्यक्ष लिङ्देनले राप्रपालाई रिब्रान्डिङ गरी जारी निर्वाचनमा पार्टीलाई सम्मानजनक स्थितिमा मात्र पुर्याएका छैनन् सरकार गठनमा पनि पार्टीलाई प्रमुख शक्तिका रुपमा उभ्याएका छन् ।
