काठमाडौँ । कतारमा जारी फिफा विश्वकप २०२२ अन्तर्गत समूह ‘सी’ को खेलमा अर्जेन्टिनाले पहिलो जित निकालेको छ ।
लुसाएल स्टेडियममा भर्खरै सम्पन्न खेलमा अर्जेन्टिनाले मेक्सिकोलाई २–० गोलले पराजित गरेको हो । अर्जेन्टिनालाई जित दिलाउन लियोनल मेसी र एन्जो फर्नान्डेजले गोल गरे ।
दुबै गोल खेलको दोस्रो हाफमा सम्भव भएको थियो । खेलको ६४ औं मिनेटमा मेसीले डी–बक्स बाहिरबाट सुन्दर गोल गर्दै अर्जेन्टिनालाई सुरुआती अग्रता दिलाए । यस्तै, ८७ औं मिनेटमा फर्नान्डेजले गोल गर्दै अर्जेन्टिनाको जित सुनिश्चित गरे ।
जितसँगै अर्जेन्टिना २ खेलमा ३ अंकसहित दोस्रो स्थानमा उक्लिएको छ । २ खेलमा ४ अंकसहित पोल्याण्ड शीर्षस्थानमा रहँदा ३ अंकसहित साउदी अरेबिया तेस्रो तथा १ अंक जोडेको मेक्सिको पुछारमा रहेको छ ।
