काठमाडौँ । प्रतिनिधिसभा र प्रदेशसभा सदस्य निर्वाचन–२०७९ मा बाहालवाला प्रधानमन्त्रीसहित चार पूर्वप्रधानमन्त्री चुनावी प्रतिस्पर्धामा हुनुहुन्छ । आइतबार सम्पन्न निर्वाचनको मतगणना जारी छ । केही स्थानको मतपरिणाम भने सार्वजनिक भइसकेको छ ।
प्रधानमन्त्री शेरबहादुर देउवा तथा पूर्वप्रधानमन्त्रीहरु केपी शर्मा ओली, पुष्पकमल दाहाल ‘प्रचण्ड’, माधवकुमार नेपाल र झलनाथ खनाल चुनावी प्रतिस्पर्धामा उत्रिनुभएको छ । प्रधानमन्त्री देउवा र पूर्वप्रधानमन्त्री ओली विजयी भइसक्नुभएको छ । पूर्वप्रधानमन्त्रीद्वय दाहाल र नेपाल जारी मतगणनामा अगाडि हुनुहन्छ भने पूर्वप्रधानमन्त्री खनाल मतगणनामा पछि पर्नुभएको छ ।
प्रधानमन्त्री एवं नेपाली कांग्रेसका सभापति शेरबहादुर देउवा डडेलधुरा निर्वाचन क्षेत्र नं १ बाट २५ हजार पाँच सय ३४ मतसहित विजयी हुनुभएको छ । उहाँको निकटतम प्रतिद्वन्द्वी स्वतन्त्र उम्मेदवार सागर ढकालले १३ हजार ४२ मत प्राप्त गर्नुभयो ।
यस्तै झापा निर्वाचन क्षेत्र नं ५ बाट एमाले अध्यक्ष एवं पूर्वप्रधानमन्त्री ओली फराकिलो मतान्तरसहित विजयी बन्नुभएको छ । उहाँले ५२ हजार तीन सय १९ मत प्राप्त गर्नुभयो । उहाँको निकटतम प्रतिस्पर्धी कांग्रेसका खगेन्द्र अधिकारीले २३ हजार सात सय ४३ मत प्राप्त गर्नुभयो ।
पूर्वप्रधानमन्त्री एवं माओवादी केन्द्रका अध्यक्ष दाहाल गोरखा क्षेत्र नं २ बाट चुनावी प्रतिस्पर्धामा हुनुहुन्छ । उहाँले हालसम्म २१ हजार ७५ मत प्राप्त गर्नुभएको छ । उहाँको निकटतम प्रतिद्वन्द्वी राष्ट्रिय स्वतन्त्र पार्टीका उम्मेदवार कविन्द्र बुर्लाकोटीले आठ हजार चार सय ६३ मत प्राप्त गर्नुभएको छ । सो क्षेत्रमा मतगणना जारी छ ।
रौतहट क्षेत्र नं १ मा पूर्वप्रधानमन्त्री एवं नेकपा (एकीकृत समाजवादी)का अध्यक्ष माधवकुमार नेपालले अग्रता कायम गरिराख्नुभएको छ । उहाँले २३ हजार एक सय ४९ मत पाउँदा निकटतम प्रतिद्वन्द्वी एमालेका अजयकुमार गुप्ताले १८ हजार दुई सय नौ मत प्राप्त गर्नुभएको छ ।
पूर्वप्रधानमन्त्री एवं एकीकृत समाजवादीका नेता झलनाथ खनाल भने जारी मतगणनामा पछि पर्नुभएको छ । इलाम क्षेत्र नं १ मा एमालेका महेश बस्नेतले १० हजार दुई सय ७८ मत पाउँदा पूर्वप्रधानमन्त्री खनालले आठ हजार सात सय ८० मत मात्र पाउनुभएको छ । पूर्वप्रधानमन्त्री डा बाबुराम भट्टराई र लोकेन्द्रबहादुर चन्द यसपटकको निर्वाचनमा उम्मेदवार बन्नुभएन ।
