काठमाडौ । आन्तरिक कलहका कारण बिभाजनको डिलमा पुगेको नेकपा एमाले तत्काल बिभाजन नहुने भएको छ । पार्टी बिभाजन गरेर अघि बढ्ने तयारीमा रहेको बरिष्ठ नेता माधव नेपाल समुहले केही समय एमालेकै नाममा समानान्तर गतिबिधि सञ्चालन गर्ने तयारी गरेपछि तत्काल विभाजन नहुने भएको हो ।
नेता नेपाल निकट एक नेताका अनुसार सम्भवत सोमबार वा मंगलबार नेपालले नेता तथा कार्यकर्ताका लागि एक आह्वान पत्र जारी गर्ने तयारी गर्नुभएको छ ।आह्वान पत्रमा तल्ला कमिटीदेखि माथिल्लो तहसम्मका समितिहरुलाई समानान्तर रुपमा सञ्चालन गर्ने, पार्टीका गतिबिधि नियमित सञ्चालन गर्ने र तत्काल सरकारमा नजाने उल्लेख हुने ती नेताले जानकारी दिनुभयो ।
आफूपक्षका दोश्रो तहप्रति पुरै अविश्वास गर्नुभएका नेता नेपालले तेश्रो पुस्ता र भातृ संगठनको बलमा आफु अघि बढ्न खोज्नुभएको तर केही समय आवश्यक पर्ने भएका कारण तत्काल समानान्तर गतिविधि सञ्चालन गर्ने निष्कर्षमा पुग्नुभएको ती नेताले जानकारी दिनुभो । नेता नेपालले आफु निकट नेताहरुसँग भन्नुभयो– खै ? कसको विश्वास गर्नु ? मेरो मान्छे भनेर कुरा गर्न पठायो उल्टै ओलीको पक्षमा कुरा ल्याएर आउँछन्, यी मेरा मान्छे हुन् कि ओलीका हुन् यीनले पो हैरान बनाए ।
उहाँले पछिल्लो समय अष्टलक्ष्मी शाक्य, भिम रावल, सुरेन्द्र पाण्डे, गोकर्ण बिष्ट, भीम आचार्य लगायतका नेताहरुप्रति असन्तुष्ट रहनुभएका नेता नेपालले आफनो नजिकको नातेदार तथा नेता सोम पाण्डेसँग पनि असन्तुष्ट रहनुभएको ती नेताले जानकारी दिनुभयो । केही समयअघि नेता नेपाल निकट नेताहरुको छलफलमा नेता अमृत बोहराको भूमिकाप्रति नेपाल झनै सशंकित हुनुभएको थियो ।
स्रोतले भन्यो ‘बैठकमा नेता बोहोराले भन्नुभयो– म अनुशासन आयोगको अध्यक्षका हैसियतमा भन्छु तपाईं तत्काल ५ दलीय गठबन्धनबाट बाहिर आउनुहोस ।’बोहोराको त्यो अभिब्यक्तिपछि नेपाल निकै दवाबमा पर्नुभएको ती नेताले जानकारी दिनुभयो ।
