एजेन्सी । इंग्लिस प्रिमियर लिग फुटबल अन्तर्गत म्यान्चेस्टर सिटीले संघर्षपूर्ण जित निकालेको छ । शनिबार राति भएको खेलमा सिटीले घरेलु मैदान इतिहाडमा फुलहमलाई २–१ गोलले हराएको हो ।
खेलको १६ औं मिनेटमा जुलियन अल्भारेजले गोल गर्दै सिटीलाई सुरुवाती अग्रता दिलाएका थिए । २८ औं मिनेटमा एन्ड्रीयाज पेरेइराले पेनाल्टीमार्फत गोल गर्दै फुलहमलाई १–१ को बराबरीमा ल्याए । खेल सकिनै लाग्दा इन्जुरी समयको अन्तिम मिनेटमा एर्लिङ हालाण्डले पेनाल्टीमा गोल गर्दै सिटीलाई जित दिलाए ।
खेलको २६ औं मिनेटमा जोआओ कान्सेलोले रातो कार्ड खाँदै मैदानबाट बाहिरिएपछि सिटी १० खेलाडीमा समेटिएको थियो ।
जितसँगै म्यान्चेस्टर सिटी अंकतालिकाको शीर्षस्थानमा उक्लिएको छ । सिटीको १३ खेलबाट ३२ अंक छ । यता, फुलहम १४ खेलबाट १९ अंकसहित आठौं स्थानमा छ ।
यसैबीच, शनिबार राति नै भएको अर्को खेलमा लेस्टर सिटीले एभर्टनलाई उसकै मैदानमा २–० गोलले हराएको हो । लेस्टरलाई जित दिलाउन खेलको ४५ औं मिनेटमा योरी टिलेमान्स र ८६ औं मिनेटमा हार्भी बान्र्सले गोल गरे ।
१४ खेलबाट १४ अंकसहित लेस्टर तालिकाको १३ औं स्थानमा रहँदा समान खेलबाट समान अंक रहेपनि एभर्टन ‘जीडी’को आधारमा १५ औं स्थानमा छ ।
