एजेन्सी । अष्ट्रेपलियामा जारी टी–२० विश्वकपको निकै महत्वपूर्ण खेलमा बंगलादेशका कप्तान शकिब अल हसनले टस जितेर भारतलाई पहिले ब्याटिङको निम्तो दिएका छन् ।
भारतका कप्तान रोहित शर्माले यस विश्वकपमा पहिलो पटक टस हारेका छन् । दुवै टोलीले टोलीमा एक–एक परिवर्तन गरेका छन् ।
भारतले दीपक हुडाको स्थानमा अक्षर पटेल र बंगलादेशले सौम्या सरकारको स्थानमा शरीफुल इस्लामलाई प्लेइङ ११ मा राखेको छ ।
यो खेलमा जितसँगै भारतको सेमिफाइनल पुग्ने बाटो निकै सहज हुनेछ । यता, बंगलादेश हारेको खण्डमा यो प्रतियोगिताबाट झण्डै बाहिरिने छ । यो खेलपछि बंगलादेशको अन्तिम खेल पाकिस्तानसँग छ भने भारतले जिम्बावेसँग खेल्नेछ ।
भारतको हार भए बंगलादेशको सम्भावना पनि निकै बढ्नेछ । यदि उसले भारतपछि पाकिस्तानलाई हराएमा उसको अंक तालिकामा ८ अंक हुनेछ ।
यी समीकरणलाई हेर्दा यो खेल एक हिसाबले नकआउट नै हो भन्न सकिन्छ । हारको अवस्थामा भारतको बाटो निकै सीमित हुन सक्छ ।
हाल समुह–२ मा रहेको भारतीय टोली ३ खेलबाट २ जित र १ हारसहित ४ अंकका साथ दोस्रो स्थानमा छ । योसँगै बंगलादेशको टोली पनि सोही खेलबाट ४ अंक जोडेर तेस्रो स्थानमा छ । राम्रो रन रेटका कारण भारत अहिले बंगलादेशभन्दा अगाडि छ ।
भारतः केएल राहुल, रोहित शर्मा (कप्तान), विराट कोहली, सूर्यकुमार यादव, हार्दिक पाण्ड्या, अक्षर पटेल, दिनेश कार्तिक (विकेटकिपर), आर अश्विन, मोहम्मद। शमी, भुवनेश्वर कुमार र अर्शदीप सिंह ।
बंगलादेशः नजमुल हुसेन, लिटन दास, शकिब अल हसन, अफिफ हुसेन, नुरुल हसन, मोस्देक हुसेन, यासिर अली, तस्किन अहमद, मुस्ताफिजुर रहमान, हसन महमूद र शरीफुल इस्लाम ।
