काठमाडौँ । नेपाली राष्ट्रिय क्रिकेट टिमका पूर्वकप्तान सन्दीप लामिछानेविरुद्धको मुद्दामा आजदेखि थुनछेक बहस सुरु हुने भएको छ । उनीविरुद्धको मुद्दा न्यायाधीश माधवप्रसाद घिमिरेको इजलासमा परेको छ । अहिले इजलासले उनको बयान लिइरहेको छ । बयान सकिनेबित्तिकै आजै थुनछेक बहस सुरु हुनेछ ।
काठमाडौँ जिल्ला सरकारी वकिलको कार्यालयले सोमबार उनीविरुद्ध काठमाडौँ जिल्ला अदालतमा मुद्दा दायर गरेको थियो । नाबालिगमाथि बलात्कार गरेको आरोप लागेका सन्दीपमाथि १२ वर्ष कैद सजायको माग गर्दै सरकारी वकिलको कार्यालय मुद्दा दर्ता गरेको थियो ।
प्रहरीले गत असोज २० गते त्रिभुवन अन्तर्राष्ट्रिय विमानस्थलबाट सन्दीपलाई पक्राउ गरेको थियो । उनीमाथि भदौ ५ गते काठमाडौंको एक होटलमा नाबालिगलाई पटक–पटक बलात्कार गरेको आरोप लागेको थियो।
आरोपित सन्दीपविरुद्ध जिल्ला प्रहरी परिसर काठमाडौँ र प्रहरी वृत्त गौशालाले अनुसन्धान पूरा गरेर कात्तिक ४ गते सरकारी वकिलको कार्यालयमा अनुसन्धान प्रतिवेदन बुझाएको थियो । तर बीचमा तिहार सुरु भएकाले उनीविरुद्ध मुद्दा दर्ता हुन सकेको थिएन ।
उनीविरुद्ध प्रहरीले मुलुकी अपराध संहिताको परिच्छेद १८ को करणीसम्बन्धी कसुरको दफा २१९ जबरजस्ती करणी गर्न नहुने शीर्षकमा अनुसन्धान गरेको थियो । सो दफाको उपदफा ३ को ९घ०मा १२ वर्षसम्म कैद सजाय मागदाबी गर्न सकिने व्यवस्था रहेको छ ।
सो उपदफाको ९घ० मा १६ वर्ष वा १६ वर्षभन्दा बढी १८ वर्षभन्दा कम उमेरकी महिला भए १० वर्ष देखि १२ वर्षसम्म कैद सजाय माग दाबी गर्न सकिने उल्लेख छ ।
प्रहरीले पीडितलाई क्षतिपूर्ति दिनका लागि सन्दीपको सम्पत्ति पनि छानबिन गरेको बताइएको छ । मुद्दामा पीडितलाई क्षतिपूर्तिको पनि माग दाबी गरिएको छ ।
नेपाली राष्ट्रिय टिमका पूर्वकप्तानसमेत रहेका सन्दीपविरुद्ध होटलका सिसिटिभी फुटेज, बयान र अस्पतालको रिपोर्टलगायत प्रमाणका रुपमा पेश गरेको छ ।
क्रिकेटर सन्दीप लामिछानेले पीडित भनिएकी किशोरी र आफू राति एउटै कोठामा रहे पनि शारीरिक सम्बन्ध नराखेको बयान जिकिर गरेका छन् ।
प्रहरीले अदालतमा दायर गरेको अभियोगपत्रमा सन्दीपको बयान समावेश गरिएको छ । जसमा उनले आफू जाहेरीकर्ताकै जोडबलमा नगरकोट घुम्न गएको र नगरकोटबाट फर्कने क्रममा आफूले होस्टलमै निजलाई छोडिदिने उद्देश्यले होस्टेलको लोकेसन माग्दा निजले होस्टल बन्द भइसक्यो भनेपछि ‘होटल काठमाडौँ इन’ मा फोन गरी कोठा बुक गरिदिएको सन्दीपको भनाइ छ ।
राति एउटै कोठामा बसेको स्वीकार गरे पनि एउटै बेडमा नसुतेको सन्दीपले बयान दिएका छन् । किशोरी बेडमा र आफू कुर्सीमा बसेर लामो समय कुराकानी गरेको तथा आफू कुर्सीमै केहीबेर निदाएको उनले बताएका छन् । बिहान उठेर आफूले किशोरीलाई आफ्नै गाडीमा होस्टलसम्म पुर्याइदिएको उनको भनाइ छ ।
उता सन्दीपविरुद्ध जाहेरी दिने किशोरीले आफूमाथि सन्दीपले राति दुई पटक जबरजस्ती गरेको आरोप लगाएकी छन् ।
सोमबार प्रहरीले अदालतमा बुझाएको अभियोग पत्रमा समावेश बयानमा उनले सन्दीपले झुक्याएर नगरकोट लगेको तथा फर्किएर काठमाडौंको एउटा होटलमा राखी राति दुई पटक करणी गरेको दाबी गरेकी हुन् ।
आजदेखि प्रतिवादीको बयान लिएर थुनछेक बहस सुरु हुनेछ । अदालतले बुधबार साँझसम्म फैसला गर्ने अनुमान गरिएको छ ।
