काठमाडौँ । काठमाडौँ स्थित जर्मन दूतावासमा ‘नेपाल–जर्मन मार्ट–२०२२’ मेला सुरु भएको छ । आजदेखि सुरु भएको दुईदिने मेलाको नेपालका लागि जर्मन राजदूत डा थोमस प्रिन्जले उद्घाटन गर्नुभएको दूतावासद्वारा जारी विज्ञप्तिमा उल्लेख गरिएको छ ।
नेपाल र जर्मनीबीचको व्यापार प्रवद्र्धन गर्ने मुख्य उद्देश्यसहित आयोजना गरिएको मेलामा नेपाल र जर्मनीका उत्पादनहरूका साथै खाना र संस्कृतिको प्रदर्शन भइरहेको छ । नेपाल–जर्मन चेम्बर अफ कमर्स एण्ड इन्डस्ट्री (एनजीसीसीआई)ले जर्मन दूतावास काठमाडौँको सहकार्यमा प्रदर्शनी आयोजना गरेको हो ।
जर्मन राजदूत डा प्रिन्जले भन्नुभयो, “कोभिडका कारणले दुई वर्षदेखि अवरुद्ध भएको द्विपक्षीय व्यापारमा सकारात्मक विकासलाई निरन्तरता दिने हाम्रो उद्देश्य रहेको छ ।”
नेपाल र जर्मनीका ४० कम्पनीको सहभागिता रहने प्रदर्शनीमा जलविद्युत्, अटोमोबाइल र पर्यटन क्षेत्रका कम्पनीका स्टलहरू रहेका छन् । साथै गलैँचा, फेल्ट, हस्तकला आदिका ‘स्टल’ रहेका छन् । नेपाली तथा जर्मन खाद्य तथा पेय पदार्थका स्टलसमेत राखिएको छ । मेलामा सांस्कृतिक नृत्य पनि प्रस्तुत गरिने जनाइएको छ ।
प्रदर्शनीको लक्ष्य नेपाल र जर्मनीबीच सहकार्यको निम्ति आधार निर्माण गरी द्विपक्षीय आर्थिक सम्बन्धमा योगदान पु¥याउने रहेको छ । मेलामा करिब आठ सय जना प्रत्यक्ष र भर्चुअल प्रदर्शनीमा लगभग सात हजारले भाग लिने आयोजकको दाबी छ । रासस
