तनहुँ । तनहुँको भिमादमा हरिबोधनी एकादशीको अवसरमा वडा स्तरीय सिनियर पुरुष एवं वडा स्तरीय महिला भलिबल प्रतियोगिता आयोजना हुने भएको छ ।
सोही अवसरमा विगतमा पनि भलिबलको आयोजना गर्दै आएको भिमादको जनशान्ति युवा क्लबले यस वर्ष पनि भलिबल तथा विविध सांस्कृतिक कार्यक्रमलाई निरन्तरता दिएको हो ।
कात्तिक १४ गते अर्थात यही सोमबारदेखि सुरु हुने प्रतियोगिता १८ गतेसम्म चल्नेछ । टिम दर्ताका लागि पुरुषतर्फ ५ हजार र महिलातर्फ २५ सय शुल्क तोकिएको यस प्रतियोगितामा पुरुषतर्फको विजेताले ७० हजार ५५५ प्राप्त गर्नेछ भने उपविजेताले ४० हजार ४४४ प्राप्त गर्नेछ ।
यस्तै, महिलातर्फको विजेता टोलीले २५ हजार तथा उपविजेताले १५ हजार प्राप्त गर्ने जनशान्ति युवा क्लबले जनाएको छ । यसैगरी विभिन्न विधाका उत्कृष्ट खेलाडीलाई समेत पुरस्कार वितरण गरिनेछ । दर्शकको उल्लेख्य उपस्थिती रहने यस भिमाद रंगशालमा भलिबल एवं विविध सांस्कृतिक कार्यक्रमले खेलकुद तथा पर्यटनको क्षेत्रमा सहयोग पुग्ने क्लबले अपेक्षा राखेको छ ।
