काठमाडौं । नेपाली कांग्रेसको बिहीबार बसेको केन्द्रीय कार्यसमितिको बैठकमा पार्टीको सभापतिमा उम्मेद्वारी दिन ३० हजार रुपैयाँ धरौटी राख्नुपर्ने प्रस्ताव गरिएको छ।
महामन्त्री पूर्णबहादुर खड्काले पेश गरेको निर्वाचन निर्देशिका सभापतिको प्रत्यासी हुन चाहनेले ३० हजार रुपैयाँ धरौटी राख्नुपर्ने प्रस्ताव गरिएको हो ।
बैठकमा उपसभापतिका लागि २५ हजार, महामन्त्रीमा उम्मेद्वारी दिन २५ हजार, सहमहामन्त्रीका लागि २० हजार र केन्द्रीय सदस्यका लागि १० हजार रुपैयाँ बुझाउनु पर्ने खड्काले पेश गरेको निर्देशिकामा उल्लेख गरिएको छ ।
सभापति शेरबहादुर देउवा निवासमा बसेको बैठकले महाधिवेशनको नयाँ कार्यतालिकाबारे औपचारिक रुपमा प्रस्ताव नगरिएपनि महामन्त्री खड्काले केन्द्रीय सदस्यहरूको सुझावका आधारमा नयाँ कार्यतालिका बनाउन बैठकमा प्रस्ताव गरेका छन्।
महाधिवेशन कहिले गर्ने भन्ने विषयमा संस्थापन र इतर समूहबीच सहमति जुट्न सकेको छैन। साउन १२ गतेदेखि सुरु भएर भदौ १६–१९ सम्म महाधिवेशन पुरानो कार्यतालिका उल्लंघन भए पनि कांग्रेसले नयाँ ल्याउन सकेको छैन।
सभापति देउवा पक्षले मंसिरमा तल्ला तहको अधिवेशन सुरु गरेर माघमा महाधिवेशन गर्न चाहेको छ भने पौडेल पक्षले भदौमा हुनुपर्ने अडान राखेको छ।
