एजेन्सी । रुसमा चमेरोमा कोरोना जस्तै नयाँ भाइरसको पुष्टि भएको छ । यसको नाम खोस्ता–२ हो । वैज्ञानिकहरुका अनुसार यो मानिसमा संक्रमण गर्न सक्षम छ ।
हाल उपलब्ध कोरोना भ्याक्सिन यसको विरुद्ध प्रभावकारी छैन । तर, अहिलेसम्म कसैमा पनि यसको संक्रमण पुष्टि भएको छैन ।
प्लोस प्याथोजेन्स जर्नलमा प्रकाशित अनुसन्धानका अनुसार तपाईंले कोभिड भ्याक्सिनको एक डोज लिनुभएको छ र तपाईंको शरीरमा कोरोनाविरुद्ध एन्टिबडी भए पनि तपाईं खोस्ता-२ संक्रमणबाट बच्न सक्नुहुन्न ।
यो भाइरस पहिलो पटक सन् २०२० मा पत्ता लागेको थियो । तर, त्यसबेला अनुसन्धानकर्ताहरूले सोचेका थिए कि यसले मानिसलाई हानि गर्दैन । तर, अहिले नयाँ अनुसन्धानले यो भाइरस विश्वका लागि नयाँ खतरा बन्न सक्ने देखाएको छ ।
कोभिड–१९ रोग फैलाउने सार्स–कोभ–२ स्ट्रेन एक प्रकारको कोरोना भाइरस हो, त्यसैगरी खोस्टा–२ पनि कोरोना भाइरसको एक प्रकार हो । टाइम म्यागजिनको रिपोर्टका अनुसार खोस्ता–२ जस्तै खोस्ता–१ भाइरस पनि छ तर यसले मानिसमा संक्रमण गर्दैन ।
खोस्ता–२ भाइरस अहिले चमेरा, प्याङ्गोलिन, र्याकुन डग र सिभेटजस्ता जंगली जनावर तथा चराचुरुङ्गीमा फैलिरहेको छ । अध्ययनमा संलग्न माइकल लेट्को भन्छन् कि नयाँ भाइरसले भविष्यमा महामारीको रूप लिन सक्छ । यसबाहेक यदि यो कोरोनासँग मिसियो भने यसको संक्रमण खतरनाक साबित हुन सक्छ । तर, दुवै भाइरस लाग्ने सम्भावना निकै कम हुन्छ ।
