काठमाडौं । नेकपा एमालेले दलको अभिलेखीकरण र उदाँउदो सूर्य चिह्नसँग मिल्दाजुल्दा चिह्नहरु खारेजीको माग गर्दै निर्बाचन आयोगमा निवेदन दिएको छ ।
एमाले नेता अग्नी खरेल सहितको टोलीले एमालेले पछिल्लो पटक उपलब्ध गराएको दलको पदाधिकारी तथा सासदहरुको अभिलेखीकरण गर्न र आफ्नो पार्टीको चुनावचिन्ह सूर्यसँग मिल्दोजुल्दो चिन्ह हटाउनका लागि निवेदन दिएको हो ।
एमालेका एक नेताका अनुसार सरकारले राजनीतिक दल विभाजन गर्न सहज हुने किसिमले अध्यादेश जारी गर्न लागेको र दल विभाजन गरेर जान लागेको माधब नेपाल समूहले एमालेको चिन्हसंग मेल खाले किसिमको चिन्ह माग दाबी गर्ने सम्भाबना रहेका कारण एमालेले अगाडी नै आयोगको ध्यानकर्षण गराएको हो ।
नेकपा एमालेको माधव नेपाल पक्षको चाहना बमोजिम सरकारले आजै वा भोलिसम्ममा राजनीतिक दल विभाजनसँग सम्बन्धित अध्यादेश ल्याउने तयारी गरेको छ । नेता नेपालले आफू निकट नेताहरुलाई दल विभाजन गर्नुपर्ने अवस्था सिर्जना भएको भन्दै फोन गर्नु भएका खबरहरु आइरहेका छन् ।
नेता नेपालले आजै अपराह्न राजधानीमा जनवर्गीय संगठनहरुको संयोजनमा आयोजना गर्न लागिएको वृहत घोषणा सभा सम्बोधन गर्ने कार्यक्रम समेत छ ।
दलहरुको विभाजनसँग सम्बन्धित अध्यादेशलाई लिएर एमालेले त्यसको विरोध गरिरहेको छ । पार्टी अध्यक्ष केपी शर्मा ओलीले पनि दलभित्रका मतान्तर पन्छाएर एकताबद्ध हुन सबै नेता तथा कार्यकर्तालाई आह्वान गर्नु भएको छ । तर त्यसले माधव पक्षका मागलाई सम्बोधन गर्न नसकेको बुझिएको छ ।
