एजेन्सी । बलिउडका सुपरस्टार शाहरुख खानलाई ठूलो पर्दामा देख्नका लागि फ्यानहरू उत्सुकताका साथ प्रतिक्षामा छन् । यस्तो अवस्थामा उनी आफ्ना फ्यानहरूलाई निराश हुने कुनै मौका दिन चाहँदैनन् । शाहरुख आगामी वर्ष अर्थात् २०२३ मा तीनवटा फिल्म लिएर कमब्याक गर्न लागेका छन् ।
अर्को वर्ष शाहरुखका तीन ठूला फिल्म रिलिज हुँदैछन् । यी मध्ये एक हो एक्सन प्याक फिल्म ‘जवान’, जसलाई साउथ निर्देशक एटलीले निर्देशन गर्दैछन् । शाहरुखलाई पर्दामा हेर्न मानिसहरु यति आतुर छन् कि अर्को वर्ष रिलिज हुन लागेको फिल्म ‘जवान’को चर्चा सुरु भइसकेको छ ।
अब ‘जवान’को ओटीटी र स्याटेलाइट अधिकारसँग सम्बन्धित नयाँ अपडेट आउँदैछ । भारतीय सञ्चारमाध्यमका अनुसार यस फिल्मको ओटीटी र स्याटेलाइट अधिकार ठूलो रकममा बेचिएको छ । फिल्मको ओटीटी अधिकार ‘नेटफ्लिक्स’सँग भए पनि यसको स्याटेलाइट अधिकार ‘जीटीभी’ले किनेको छ । एक ट्विटर ह्यान्डलले ‘जवान’ को स्याटेलाइट र ओटीटी अधिकार करिब २५० करोडमा बेचेको दाबी गरेको छ ।
‘जवान’ मा शाहरुख खानसँग नयनतारा, सुनील ग्रोवर, विजय सेतुपति र सान्या मल्होत्रा देखिने भएका छन् । चलचित्र रेड चिलीज इन्टरटेनमेन्टको ब्यानरमा बनेको हो । फिल्म अर्को वर्ष जुन २ मा हलमा रिलिज हुनेछ । यस फिल्ममा शाहरुख खान डबल रोलमा देखिनेछन् । ‘जवान’को लेखन तथा निर्देशन एटलीले गरेका हुन् ।
