काठमाडौं । नेकपा (एकीकृत समाजवादी)ले पनि आगामी मंसीर ४ गते हुने प्रदेशसभा र प्रतिनिधिसभा निर्वाचनका लागि समानुपातिकतर्फको उम्मेदवारहरुको बन्दसूचि निर्वाचन आयोगमा बुझाएको छ ।
सोमबार अपरान्ह निर्वाचन आयोगमा पुगेर समानुपातिक तर्फको उम्मेदवारहरुको नामावली बुझाइएको पार्टीका उपमहासचिव गंगालाल तुलाधरले जानकारी दिनु भयो ।
उहाँले संविधान र कानुनको परिधिभित्र रहेर आफ्नो पार्टीले प्रदेशसभाका २२० सिट र प्रतिनिधिसभाको ११० सिटका लागि उम्मेदवारहरुको सूचि निर्वाचन आयोगमा बुझाइएको बताउनु भयो । उपमहासचिव तुलाधरले भन्नु भयो, ‘संविधान र कानुनको परिभाषा भित्र रहेर समानुपातिकतर्फको उम्मेदवारी दिएका छौं ।’
नेकपा एसका अनुसार समानुपातिक बन्दसूचीमा समबिष्ट प्रमुख ९ उम्मेदवार पार्टी वरियताका आधारमा तय गरिएको हो ।
जस अनुसार उपाध्यक्ष प्रमेश हमाल, उपमहासचिव डा. गंगालाल तुलाधर र सचिव नागेन्द्रकुमार चौधरी, स्थायी कमिटी सदस्यहरु सावित्राकुमारी भुसाल ,रामचन्द्र यादव ,श्रीप्रसाद साह,भविश्वर पराजुली,केन्द्रीय लेखा आयोग अध्यक्ष भरतकुमार श्रेष्ठ, र पोलिट्ब्युरो सदस्य दीलकुमारी पन्तको नाम राखिएको छ ।
