काठमाडौं । १४ सांसदलार्ई पदमुक्त गरेको सूचना नटाँसेको भन्दै कुरा गर्न एमाले सांसदको टोली आएको जानकारी पछि सभामुख कार्यकक्षमा उपस्थित नै हुनु भएन । एमाले प्रमुख सचेतक बिशाल भट्टराईले न्युजपोलारसंग भन्नुभयो- 'सभामुखले पदमुक्त भएको सुचना तत्काल सार्वजनिक गर्नुपर्नेमा उहाँ भाग्दै हिड्नु भएको छ कति दिन भाग्नु होला हामी पनि हेरौंला ।'
नेता भट्टराईले भन्नुभयो- 'पार्टीले गरेको सिफरिस कार्यान्वयन नगर्ने बिकल्प नै छैन यसमा सभामुखको स्वबिकेकीय अधिकारको कुरा नै छैन । उहाँ एमाले बिभाजनको मतियार बन्नुभएको छ, एमाले विभाजनको षड्यन्त्र उहाँका लागि आगामी दिनमा महँगो पर्नेछ । सभामुखको यस्तै रबैया रहे आगामी दिन कसरी संसद चलाउनु हुन्छ हामी पनि हेरौला ।'
यसअघि जनता समाजबादी पार्टीका सांसद सरिता गिरीको २४ घण्टा भित्र, माओबादी केन्द्रका ५ सांसदको ४८ घण्टा भित्र सूचना टाँस गरेका सभामुखले चार दिन पुरा हुँदा पनि चासो नदिएकोमा भट्टराईले आपत्ति जनाउनु भयो । बिहीबार पनि सभामुखसँग कुरा गरेका एमालेका सांसदहरुले शुक्रबार पुनः आउने जानकारी गराएका थिए ।
तर आज भने सभामुख प्रत्यक्ष सम्पर्कमा आउनु भएन । उहाँको सचिवालयमा सम्पर्क गर्दा विभिन्न कारण देखाइयो । एमालेका करिब १६ जना सांसद सभामुखको कार्यकक्षमा एक घण्टा जति बसेर फर्किएका छन् ।
