एजेन्सी । भारतको बिहारस्थित बेगुसरायमा मंगलबार साँझ ६ बजे नेशनल आइवे २८ मा मोटरसाइकल सवार दुई व्यक्तिले गोली चलाएका छन् ।
दुवै आतङ्ककारीले ३० किलोमिटरको दायराभित्र गोलीबारी जारी राखेका थिए । ती आतंककारीले बाटोमा जो आयो उसैलाई गोली प्रहार गर्दा ११ जनालाई गोली लागेको छ ।
गोली प्रहारबाट पञ्चायत समिति सदस्य अमित कुमारको मृत्यु भएको छ भने निजी फाइनान्सका कर्मचारीसहित १० जना घाइते भएका छन् । जसमध्ये ३ जनाको अवस्था गम्भीर रहेको बताइएको छ । भारतमा अमेरिकाजस्तै यस्तो सामूहिक गोलीबारी भएको सायद यो पहिलो घटना हो ।
प्रहरीले समस्तीपुरबाट २ जनालाई पक्राउ गरेको छ । भाजपाले आज बेगुसराय बन्दको आह्वान गरेको छ । केन्द्रीय मन्त्री गिरिराज सिंहले नितिश कुमारको राजीनामा मागेका छन् । एसपीले यस विषयमा प्रहरीको लापरवाही स्वीकार गरेका छन् भने ७ प्रहरी निलम्बित भएका छन् ।
एनएच २८ मा, कालो हेलमेट र सेतो शर्ट लगाएका एक व्यक्ति मोटरसाइकलमा सवार थिए, पछाडि बसेका युवकले निर्मम रूपमा गोली चलाइरहेका थिए । दुवै आक्रमणकारीले ४० मिनेटमा ३० किलोमिटरसम्म गोली हानेका थिए । यस क्रममा उनले ११ जनालाई गोली हाने ।
यसैबीच, समस्तीपुरको उजियारपुर प्रहरीले मंगलबार राति राष्ट्रिय राजमार्ग–२८ स्थित बहिरा चोक नजिकै सवारी चेकजाँचका क्रममा मोटरसाइकलमा सवार दुईजना लुटेरालाई पक्राउ गरेको छ । दुवैको साथबाट पेस्तोल र भारी कारतूस बरामद भएको छ । दुवैको उमेर २५–२६ वर्षको हाराहारीमा छ ।
बेगुसरायमा यी दुईले गोली चलाएको हुनसक्ने प्रहरीले अनुमान गरेको छ । सोधपुछका क्रममा दुवैले गोली चलाएको घटनाबाट आफूलाई टाढै राखेका छन् । दुवै बेगुसराईका बासिन्दा रहेको बताइएको छ ।
