एजेन्सी । युक्रेनमा रहँदै आएका रुस समर्थित अलगाववादिहरुले पछिल्लो २४ घण्टामा पूर्वी युक्रेनमा आक्रमण गरेका छन् ।
आक्रमणका क्रममा एक युक्रेनी सैनिकले ज्यान गुमाएका छन् भने अन्य ६ जना घाइते भएका छन् ।
रुसले युक्रेनको लुहान्स्क र डोनेट्स्कलाई स्वतन्त्र देश घोषित गर्दै त्यहाँ सैनिक तैनाथ गरेको छ । जसकारण त्यस क्षेत्रमा झडपहरु बढेको छ ।
पछिल्लो २४ घण्टामा गोलाबारीको मात्रै ९६ घटनाहरु भएको बताइएको छ । यसभन्दा पहिले पूर्वी युक्रेनमा रुस समर्थित अलगाववादिहरुले एक कारलाई निशाना बनाएका थिए भने एक ग्यास पाइप लाइनलाई पनि विस्फोट गराई उडाएका थिए ।
यसैबीच, युक्रेनले संकटकाबीच विश्वकै ठूलो देश रुसलाई रोक्नका लागि प्रयासहरु द्रुत गतिमा अगाडी बढाएको छ । पछिल्लो २४ घण्टाको अवधिमा अमेरिका, बेलायत, क्यानडा, जापान, अष्ट्रेलिया र जर्मनीले रुसमा प्रतिबन्धको घोषणा गरेका छन् ।
युक्रेनका दुई प्रान्त लुहान्स्क र डोनेस्कमा पनि प्रतिबन्ध लगाइएको छ । उनीहरुलाई बुधबार बिहान रुसले छुट्टै राष्ट्रको रुपमा मान्यता दिएको थियो ।
क्यानडाले बुधबार बिहान रुसी बैंकहरूमा प्रतिबन्ध लगाएको छ । जसअनुसार क्यानेडियनहरूले लुहान्स्क र डोनेट्स्कमा कुनै पनि आर्थिक लेनदेन गर्न सक्ने छैनन् ।
यसअघि अष्ट्रेलियाले पुटिनका शीर्ष सल्लाहकारहरूलाई प्रतिबन्ध लगाएको थियो । प्रधानमन्त्री स्कट मोरिसन भन्छन्, ‘हामीले रुसी संघको सुरक्षा परिषद्का आठ सदस्यको यात्रा र आर्थिक लेनदेनमा प्रतिबन्ध लगाएका छौं।’ उनले आगामी २४ घण्टाभित्र रुसले युक्रेनमाथि हमला गर्न सक्ने पनि बताए ।
