काठमाडौँ । बलात्कार आरोप लागेका नेपाली राष्ट्रिय क्रिकेट टोलीका निलम्बित कप्तान सन्दीप लामिछानेले आफू निर्दोष रहेको बताएका छन् ।
हाल क्यारेबियन प्रिमियर लिग (सीपीएल) मा सहभागिता जनाउन वेस्ट इन्डिज (जमैका) मा रहेका लामिछानेले सामाजिक सञ्जाल फेसबुकमार्फत आधारहीन आरोपहरुको सामना गर्न सीपीएलबाट बिदा लिएर केही दिनभित्रै नेपाल फर्कने बताएका छन् ।
उनले भनेका छन्, “म यी सबै आधारहीन आरोपहरुको सामना गर्न तयार छु, निर्दोषलाई न्याय मिलोस् र सम्बन्धित सबैको सही छानबिन होस् ।”
नेपालको सम्मानित कानूनप्रति पूर्ण विश्वास रहेको भन्दै उनले कानूनले समान व्यवहार गर्ने आशा गरेका छन् ।
