काठमाडौँ । काठमाडौँ महानगरपालिकाले आजदेखि असन क्षेत्रका फुटपाथको व्यापार हटाउन थालेको छ ।
पछिल्लो समयमा महानगरले इन्द्रचोक क्षेत्रमा अव्यवस्थितरुपमा सञ्चालन भइरहेको सवारी पार्किङका साथै मन्दिर वरपर सञ्चालन भइरहेका व्यवसायलाई हटाउन थालेको छ । आज फुटपाथमा राखिएका व्यवसायलाई हटाउन सुरु गरेको हो ।
फुटपाथमा राखिएका भाँडाकुँडा, खेलौना, फेन्सीका सामान, माटाका सामग्रीका कारण सधैँ झैँ मानिसको घुइँचो लाग्ने असन क्षेत्रमा मानिस तथा सवारी साधनको आवागमनमा असहज स्थिति उत्पन्न हुँदै आएको छ ।
महानगर प्रहरीले फुटपाथमा राखिएका त्यस्ता व्यवसाय भोलि (बुधबार) बिहानसम्म हटाउन निर्देशन दिएको छ ।
