काठमाडौँ । नेपाली राष्ट्रिय फुटबल टिमका गोलकिपर किरण चेम्जोङको आज विवाह हुँदैछ । उनले प्रेमिका कञ्चन निरौलासँग विवाह गर्न लागेका हुन् । कञ्चनलाई किरणले गत असार २१ गते माल्दिभ्समा विवाह प्रस्ताव राखेका थिए ।
आफन्त र सीमित साथीभाइबीच विवाह गर्न लागेका किरण र कञ्चनले सोमबार मेहन्दी कार्यक्रम गरेका थिए ।
माल्दिभ्सको शीर्ष डिभिजन फुटबल लिगमा किरण लिगकै उत्कृष्ट गोलकिपर घोषित भएका थिए । आफ्नो क्लबलाई लिग जिताएर ट्रफी लिने क्रममै उनले प्रेमिका कञ्चनलाई मैदानमा लगेर औँठी लगाइदिँदै विवाह प्रस्ताव राखेका थिए ।
पेशाले एयरहोस्टेस कञ्चन र किरण केही वर्षदेखि प्रेममा रहेका थिए । किरणले विवाह प्रस्ताव राखेपछि दुवैले दुई साता माल्दिभ्समा बिदा बनाएका थिए ।
