काठमाडौँ। नेपाल प्रहरीका ११ जना कर्मचारी लामो समयदेखि सम्पर्कविहीन भएका छन्।
सोमबार प्रकाशित सूचना अनुसार, विभिन्न दर्जाका यी कर्मचारीहरू बिना सूचना कार्यक्षेत्रमा अनुपस्थित रहेका र घरमै खोजी गर्दा समेत फेला नपरेपछि अन्तिम पटक स्पष्टीकरण पेश गर्ने मौका दिइएको हो।
प्रहरी महानिरीक्षकको सचिवालयले बाटोको म्याद बाहेक सात दिनभित्र सन्तोषजनक जवाफसहित हाजिर हुन निर्देशन दिएको छ।
तोकिएको समयभित्र हाजिर नभएमा ‘प्रहरी नियमावली २०७१’ बमोजिम उनीहरूलाई सेवाबाट हटाउने (डिस्मिस गर्ने) चेतावनी प्रधान कार्यालयले दिएको छ। गैरहाजिर हुनेहरूमा काठमाडौं, सुर्खेत, ओखलढुङ्गा, धनुषा, चितवन लगायतका क्षेत्रमा कार्यरत प्रहरी सहायक निरीक्षक (प्र.स.नि.) देखि कार्यालय सहयोगीसम्म रहेका छन्।
