काठमाडौँ। चीनले कुनै पनि राजनीतिक सर्तहरू संलग्न गर्न नहुने, ‘जबरदस्ती कूटनीति’ गर्न नहुने र आफ्नो स्वार्थका लागि अन्य देशको सार्वभौमसत्ता र हितमा आँच आउन नहुनेमा जोड दिएको छ । चिनियाँ परराष्ट्र मन्त्रालयले आज गरेको नियमित पत्रकार सम्मेलनका क्रममा मन्त्रालयका प्रवक्ता ह्वा छुन यिङले अन्तर्राष्ट्रिय विकास सहयोगले आपसी सम्मानको सिद्धान्तलाई पालना गर्नुपर्ने बताउनुभयो ।

उहाँले सम्बन्धित देशको सार्वभौमसत्ता र जनताको इच्छाको पूर्ण सम्मान गर्ने र अन्य देशको आन्तरिक मामिलामा हस्तक्षेप नहुने कुरामा चीनले सधैँ विश्वास गरेको कुरामा जोड दिनुभयो। पत्रकार सम्मेलनमा अमेरिकी सहायता परियोजना एमसीसी संसद्बाट पारित नभए नेपाल–अमेरिका सम्बन्धमा असर पर्नसक्ने भनी अमेरिकाले दिएको दबावप्रति सोधिएको प्रश्नमा उहाँले दबावमा सहयोग लिन नसकिने उल्लेख गर्नुभयो । उहाँले भन्नुभयाे ‘उपहार अल्टिमेटमको प्याकेजसहित कहिलेबाट आउन थाल्यो, मलाई आश्चर्य लागेको छ । यस्तो उपहार जो कोहीले कसरी स्वीकार गर्न सक्छ ? यो उपहार हो वा पान्डोराज बक्स ?"

नेपालस्थित अमेरिकी दूतावासले एमसीसीको ५० करोड अमेरिकी डलरको सहायता अमेरिकी जनताले नेपाली जनतालाई दिएको उपहार हो भन्ने सार्वजनिक रुपमा बताएको उल्लेख गर्दै उहाँले भन्नुभयो, “अल्टिमेटम दिएर कसरी उपहार दिन सकिन्छ ? यस्तो ‘उपहार’ कसरी स्वीकार गर्न सकिन्छ ?”

यो पनि पढ्नुहोस् –  सहयोग राजनीतिक शर्तरहित नेपाली जनताको चाहनाबमोजिम हुनुपर्ने: चीन