काठमाडौँ । काठमाडौँ उद्योग वाणिज्य संघले काठमाडौँ महानगरपालिकाका प्रमुख बालेन्द्र साह (बालेन) ले शक्तिको दुरुपयोग गरेको बताएको छ ।
काठमाडौँ उद्योग वाणिज्य संघ काठमाडौँका व्यापारीहरुको संस्था हो । उसले केही दिनदेखि महानगरले अनधिकृतरुपमा बनेका भौतिक संरचना हटाउने अभियान सुरु गर्दा साना व्यापारीहरुलाई मर्का परेको भन्दै महानगरको सो कार्यप्रति गम्भीर आपत्ति जनाएको छ ।
संघका अध्यक्ष दिनेश श्रेष्ठका अनुसार घरधनी र महानगरबीचको विवादको भुङ्ग्रोमा व्यापारीलाई पारिएको छ । “अहिलेको विवाद घरबेटी र महानगरको हो, यसमा किन साना व्यवसायीलाई बिचल्ली बनाइयो ? जननिर्वाचित मेयरले शक्तिको दुरुपयोग गरे, आफ्नो कर तिरेको सम्पत्तिमा आफ्नो अधिकार किन हुन्न ?” अध्यक्ष श्रेष्ठले भन्नुभयो ।
अध्यक्ष श्रेष्ठ नेपाल उद्योग वाणिज्य महासंघको उपाध्यक्षसमेत हुनुहुन्छ । संघले आपत्कालीन बैठक बोलाएको छ । दशैँको मुखमा व्यवसायीमाथि भएको अन्यायबारे साझा धारणा बनाउन आपत्कालीन बैठक बोलाइएको श्रेष्ठले बताउनुभयो ।
