काठमाडौं । काठमाडौं महागरपालिकाका मेयर बालेन शाह बिहीबार अनधिकृत संरचनाहरु हटाउँने क्रममा वुद्धनगरको अल्फा बिटा कम्प्लेक्समा पुगेका छन् ।
अल्फाबिटाले भवनको अगाडिको भागमा सटर निकालेर फर्मेसी सञ्चालन गर्न दिएको छ तर पार्किङ भने सडक पेटीमा हुने गरेको छ । अनधिकृत संरचनाहरु हटाउँने अभियानमा हिडेका मेयर शाहले घरको नक्सा माग्दा उपस्थित अल्फाबिटाका प्रतिनिधिले उल्टो मेयरसँग नक्सा मागे ।
सोहि क्रममा मेयर बालेनले प्रश्न गरे, तपाईँको घरको नक्सा मसित हुनुपर्छ ? त्यस्तै , अल्फाबिटाका प्रतिनिधिले पनि नगरपालिकामा के हुन्छ त ? भनेर मेयरलाई प्रतिप्रश्न गरे ।
बालेनले तत्काल पत्रिका निकालेरको ३५ दिने सूचना देखाए । अनि जंगिदै बोले, ‘यहाँ यत्रो नोटिस दिएको छ, यो के हो ? ३५ दिनभित्र खाली गर भनेर नोटिस दिएको छैन ? तपाईँको घरको नक्सा मसँग हुन्छ कि तपाईसँग ?’
अल्फाबिटाका प्रतिनिधिले आफूहरुले कुनै गलत काम नगरेको, तर मिडिया लिएर आएको भन्दै असन्तुष्टि जनाए ।
तत्काल प्रतिवाद गर्दै बालेन ले आफूहरुले कुनै पनि प्रकारको मिडिया स्टन्ट नगरेको बताए । महानगरका साढे २ लाख घरमा गएर सूचना दिन नसक्ने भएर पत्रिकामा सूचना निकालेको र अवैध संरचना हटाउनुपर्ने बताए ।
महानगरका कर्मचारीले अफिसमा नै नक्सा लिएर आउन आग्रह गरे । तर अल्फाबिटाका प्रतिनिधिले लिखित लिएर वकिलसहित आउने बताए ।
