काठमाडौँ । सत्ता गठबन्धनको प्रमुख घटक नेपाली कांग्रेसकी सांसद पार्वता डिसी चौधरीले नागरिकता विधेयक आफूलाई ठिक नलागेको बताउनुभएको छ । पार्टीका अन्य सांसदहरुले पनि नागरिकता विधेयक राम्रो नलागेको तर पार्टी बन्धनका कारण उनीहरुले विधेयकको विरोधमा बोल्न नसकेको बताउनुभयो ।
प्रतिनिधिसभाको बिहीबारको बैठकमा राष्ट्रपति विद्यादेवी भण्डारीले पुनरविचारका लागि फिर्ता पठाउनुभएको नागरिकता विधेयक र फिर्ता गर्दा लेखेको सन्देशमाथिको छलफलमा सांसद चौधरीले विधेयक नराम्रो लागेको कुरा आफूले भन्नै पर्ने बताउनुभयो । यद्यपि सो विधेयक निर्णयार्थ प्रस्तुत गर्दा विधेयकको पक्षमा मतदान गर्ने उहाँको भनाइ थियो ।
पार्टी बन्धनका हिसाबले नागरिकता विधेयकलाई समर्थन गर्न सकिने भए पनि व्यक्तिगतरुपमा भन्नुपर्दा आफ्नो आत्माले विधेयक ठिक नरहेको भन्न चाहेको उहाँले बताउनुभयो ।
उहाँले वैवाहिक अंगीकृत नागरिकताबारे समयसीमा हुनुपर्ने भन्दै नेपालमा विवाह गरेर आउने विदेशी महिलालाई विवाह गर्नेबित्तिकै नागरिकता दिन नहुने बताउनुभयो ।
