काठमाडौँ । नेपालले युक्रेनको डोनेट्स्क र लुहान्स्क क्षेत्रलाई स्वतन्त्र संस्थाका रूपमा मान्यता दिनु संयुक्त राष्ट्रसङ्घको बडापत्रको प्रावधान विपरीत भएको बताएको छ ।
परराष्ट्र मन्त्रालयले आज एक विज्ञप्ति जारी गर्दै नेपालले कुनै पनि परिस्थितिमा सार्वभौमसत्ता सम्पन्न देश विरुद्ध कुनै पनि शक्तिको प्रयोगको विरोध गर्दछ र कूटनीति तथा संवादबाट विवादको शान्तिपूर्ण समाधानमा विश्वास गर्दछ भनेको छ ।
युक्रेनको हालैका घटनाक्रमलाई नेपालले नजिकबाट नियालिरहेको भन्दै मन्त्रालयले तनाव नबढाउन सबै पक्षलाई अधिकतम संयम अपनाउन आग्रह गरेको छ ।
विज्ञप्तिमा भनिएको छ, “संयुक्त राष्ट्रसङ्घको सदस्यको हैसियतमा नेपालले संयुक्त राष्ट्रको बडापत्रमा उल्लेखित सार्वभौमसत्ता र क्षेत्रीय अखण्डताका सिद्धान्तहरू प्रतिस्थापित भएको र सबै सदस्य राष्ट्रले यसलाई पूर्णरूपमा सम्मान गर्नुपर्छ भन्ने धारणा राख्छ।”
