काठमाडौँ । अर्थमन्त्री जनार्दन शर्मा अहिले सपत्नी पर्वतमा रमाइरहेका छन् । उनी हिजो बुधबार पर्वत पुगेका हुन् । उनी बुधबार राति द क्लिफ रिसोर्टमा बसेका थिए। शर्माले आज बिहान क्लिफ स्काई क्याफेमा पत्नीसहित खाजा खाएका थिए । लगत्तै उनले पर्वत जिल्ला अस्पतालको निरीक्षण गरे । त्यसपछि माओवादी कार्यकर्तासँग भेटघाट गरेका थिए।
अर्थमन्त्री शर्माले आज बिहान गुप्तेश्वर महादेव मन्दिरको दर्शन गरेका थिए। मन्दिरमा उनीसँगै सांसद दीनानाथ शर्मा पनि थिए ।
अर्थमन्त्री शर्मा उद्योग वाणिज्य सङ्घ पर्वतको ४६औँ स्थापना दिवस र ३९औँ साधारणसभामा सहभागी हुन पर्वत गएको भनिएको छ । तर यथार्थ के हो भने छलफलका लागि प्रतिनिधिसभाको बैठकमा एमसीसीलाई प्रस्तुत गर्नुपर्छ भनेर उनी पर्वततिर हानिएका हुन् । संसद् सचिवालयले प्रतिनिधिसभाको आज बस्ने बैठकका लागि निकालेको सूचनामा अर्थमन्त्री जनार्दन शर्माले प्रतिनिधिसभामा ‘एमसीसीमाथि छलफल गरियोस्’ भन्ने प्रस्ताव प्रस्तुत गर्ने कार्यसूची निकालेको छ । बैठकमा प्रस्ताव प्रस्तुत गरिसकेपछि छलफलमा उठेका प्रश्नको जवाफ पनि उनले दिनुपर्ने हुन्छ ।
आफू काठमाडौँमा हुँदा एमसीसी सदनमा प्रस्तुत गर्नुपर्ने डरले उनी पर्वततिर गएका हुन् । आफ्नो पार्टी नेकपा माओवादी केन्द्रले एमसीसीको विपक्षमा मतदान गर्ने निर्णय गरिसकेकाले उनले सदन छलेका हुन् । आइतबार पनि उनी प्रतिनिधिसभाको बैठकमा एमसीसी टेबल गर्न गएका थिएनन् । कार्यसूचीमा उनको नाम भए पनि बिरामी परेको बहाना बनाई उनी सदनमा गएनन् । उनको सट्टा सञ्चार तथा सूचना प्रविधिमन्त्री ज्ञानेन्द्रबहादुर कार्कीले संसद्मा एमसीसी टेबल गरेका थिए । लोकतान्त्रिक संसदीय अभ्यासमा मन्त्रिपरिषद्को सदस्यका नाताले एमसीसीलाई प्रस्तुत गर्न उनी सदनमा उपस्थित हुनुपथ्र्यो ।
तर सामान्य संसदीय परम्परालाई नै धज्जी उडाउने गरी उनी सदनबाट भागेका छन् । अझ उनी संसद्बाट एमसीसीलाई फेल गराउनुपर्ने भन्दै हिँडेका छन् । उनकै पार्टी माओवादी केन्द्रसमेत सत्तामा रहेर सरकारकै बर्खिलापमा लागेको छ । एकातिर सत्ता गठबन्धन टुट्न नहुने भन्दै हिँड्ने अनि सरकारले प्रस्तुत गरेको एमसीसीको विपक्षमा मतदान गर्ने भन्ने माओवादी केन्द्रले कतिसम्मको नैतिकताको प्रदर्शन गरेको हो बुझिनसक्नु छ ।
