काठमाडौं । सत्ता गठबन्धनका नेताहरुले दार्चुलाका जयसिंह धामी बेपत्ता प्रकरणमा सरकारको अडान के हो भन्दै प्रधानमन्त्री देउवालाई प्रश्न गरेका छन् । सरकारको काम कारबाही, मन्त्रीमण्डलको पूर्णता लगायतका विषयमा छलफल गर्न बसेको बैठकका केही नेताहरुले दार्चुला प्रकरणमा सरकारको धारणा माग गरेका हुन् ।
बैठकमा सहभागी एक नेताका अनुसार नेकपा माओवादी केन्द्रका नेता नारायणकाजी श्रेष्ठले महाकाली नदि तर्ने क्रममा भारतीय सीमा सुरक्षा बल (एसएसबी)का जवानले तार खुस्काइदिँदा जयसिंह धामी महाकाली नदीमा खसेका घटनाम सरकारले प्रष्टदृष्टिकोण राख्न नसकेको भन्दै प्रधानमन्त्री देउवाको आलोचना गर्नुभयो ।
बैठकमा उहाँले भन्नुभयो, राष्ट्रले यस विषयमा जवाफ खोजिरहेको छ, छानबिन समितिको प्रतिवेदन पनि सार्वजनिक हुनुपर्यो, हाम्रो अडान प्रष्ट पार्नुपर्यो र त्यसका आधारमा भारतसँग वार्ता गर्नुपर्यो, भारतले गल्ती स्वीकार गर्नुपर्छ । बारम्बार नेताहरुले यस विषयलाई उठाए पनि प्रधानमन्त्री देउवाले भने स्पष्ट जवाफ दिनुभएन । बैठकमा सहभागी एक नेताका अनुसार प्रधानमन्त्री देउवाले पटक पटक "अ-अ" मात्र भन्दै विषयान्त्र गर्नुभएको थियो ।
गत १५ साउनमा महाकाली नदि तर्ने क्रममा भारतीय सीमा सुरक्षा बल (एसएसबी)का जवानले तुईनको तार खुस्काइदिँदा जयसिंह धामी महाकाली नदीमा खसेका थिए । धामीको अबस्था हालसम्म अज्ञात रहेको छ । चौतर्फी दवाव पछि सरकारले गृहमन्त्रालयका सहसचिवको नेतृत्वमा छानबिन समिति बनाए पनि अहिलेसम्म समितिले प्रतिवेदन तयार पारेको छैन । १० दिनको समयसीमा दिई गठन गरिएको समितिको म्याद पटक पटक थपिएको छ । उता संसदीय समितिले पनि गृहमन्त्री बालकृष्ण खाडलाई घटनाको सत्य तथ्य बाहिर ल्याउन निर्देशन दिएको छ । सरकारले भने धामीको परिवारलाई १० लाख रुपियाँ क्षतीपूर्ति दिने निर्णय गरेको छ ।
