काठमाडौँ । प्रतिनिधिसभाको आजको बैठक स्थगित भएपछि अहिले संसद् भवनमा प्रधानमन्त्री शेरबहादुर देउवा र प्रमुख प्रतिपक्षी नेकपा (एमाले) का अध्यक्ष केपी शर्मा ओलीबीच छलफल भइरहेको छ ।
छलफलका लागि प्रधानमन्त्री देउवा ओलीको कार्यकक्षमा पुग्नुभएको बताइएको छ । छलफलमा नेपाली कांग्रेसका महामन्त्री गगन थापा, केन्द्रीय सदस्य ज्ञानेन्द्रबहादुर कार्की तथा एमालेका सुवास नेम्वाङ सहभागी हुनुहुन्छ ।
सदनको आजको कार्यसूचीमा एमसीसीमाथि छलफल गर्ने कार्यक्रम थियो । तर प्रधानमन्त्री देउवाकै आग्रहमा आजको बैठक स्थगित गरिएको हो । सत्ता साझेदार दल नेकपा माओवादी केन्द्र र नेकपा एकीकृत समाजवादीले एमसीसीको विपक्षमा मतदान गर्ने निर्णय गरेपछि प्रधानमन्त्री देउवाले प्रमुख प्रतिपक्षी एमालेको साथ खोज्नुभएको छ ।
यसअघि उहाँहरुबीच अध्यक्ष ओली निवास बालकोट र प्रधानमन्त्री निवास बालुवाटारमा दुई पटक एमसीसी पारित गर्ने सम्बन्धमा छलफल भइसकेको छ ।
