पोखरा । गण्डकी प्रदेशका मुख्यमन्त्री कृष्णचन्द्र नेपाली पोखरेलले नेपाली कांग्रेसमा प्रवेश गरेका पोखराका अग्रज पर्यटन व्यवसायी गणेशबहादुर भट्टराईसहित युवालाई शुभकामना दिएका छन् । बुधबार निवासमै आयोजित कार्यक्रममा मुख्यमन्त्री पोखरेलले बिपीको सिद्धान्तलाई आत्मसात गर्दै लोकतान्त्रिक समाजवादलाई संस्थागत गर्नु पर्ने बताए ।
मुलुकलाई समृद्धिको बाटोमा डोर्याउने दायित्व नेपाली कांग्रेसको रहेको भन्दै यसका लागि युवाहरु अग्रसर हुनुपर्ने उनको भनाइ थियो । लामो समयदेखि पर्यटन र अन्य व्यवसायमा आबद्ध युवाहरुको प्रवेशले कांग्रेस थप सशक्त भएको मुख्यमन्त्री पोखरेलले बताए । नवप्रवेशीहरुलाई जिम्मेवारी दिएर पार्टीलाई सशक्त बनाउने जिम्मा पुराना नेता कार्यकर्ताको रहेको भन्दै यसको व्यवस्थापनमा जोड दिन उनले आग्रह गरे । पार्टीको महाधिवेशन, स्थानीय तहको निर्वाचन र त्यसपछि हुने प्रदेश सभा र प्रतिनिधि सभाको निर्वाचनमा परिणाम आफ्नोतिर आउनेगरी काम गर्न मुख्यमन्त्री पोखरेलले आग्रह गरे ।
कार्यक्रममा प्रदेशका कानुन, सञ्चार तथा प्रदेश सभा मामिला मन्त्री बिन्दुकुमार थापाले पोखराका पूर्व मेयर गणेशबहादुर भट्टराईको प्रवेशले कास्कीको राजनीतिमा ठूलो हलचल मच्चाएको बताए । संघीयतामा प्रशस्त सम्भावना र अवसर रहेको भन्दै क्षमता अनुसार नेतृत्व लिन नवप्रवेशीलाई उनले आग्रह गरे ।
कार्यक्रममा अग्रज पर्यटन व्यवसायी गणेशबहादुर भट्टराईले सुशासनका लागि व्यवसायीहरुलाई राजनीतिमा आकर्षित गर्नुपर्ने बताए । राजनीतिक नेतृत्वबाटै सुशासनको सुरुआत हुनुपर्ने भन्दै भ्रस्टाचारबाट मुलुकलाई जोगाउनुपर्ने अहिलेको मुख्य चुनौती रहेको भनाइ राखे । कोरोनाको महामारीबाट पर्यटन व्यवसायी सारै मारमा परेको भन्दै अहिले खोप उपलब्ध गराएर थोरै भए पनि राहत प्रदान गर्न उनले आग्रह गरे । पोखरा र आसपासको पर्यटनलाई जगाउन १५ हजारजति खोप उपलब्ध गराउनुपर्ने उनको भनाइ थियो । ट्रेकिङ रुटका व्यवसायीलाई समेत खोप दिलाउन उनले आग्रह गरे ।
पर्यटन व्यवसायीलाई पुनर्कर्जा र साना व्यवसायीलाई व्यवसाय जीवन रक्षा कोष दिने भनिए पनि प्रभावकारी रुपमा कार्यान्वयन हुन नसकेको उनले बताए । उनले भने,‘व्यवसायीहरु भाडा तिर्न नसक्ने अवस्थामा छन्, कति त पलायन भइसके, अब पनि केही गर्न सकिएन भने अवस्था भयावह हुन्छ ।’
पर्यटन बोर्डका पूर्व सदस्य टीकाराम सापकोटाले गणेश भट्टराईसहित १२ जना व्यवसायीको प्रवेशले पार्टीमा जोश र जाँगर बढेको भनाइ राखे । अब सरकारले पर्यटन पुनरुत्थानमा जोडन दिन आग्रह गर्दै उनले सर्भाइभल, रिभाइभल र एराइभललाई अभियानका रुपमा अगाडि बढाउन सुझाव दिए ।
उक्त अवरमा रेबान पोखराका पूर्व अध्यक्ष चौबहादुर गुरुङले नजिकिँदै गरेको पर्यटन दिवस भव्यरुपमा मनाउन लागेको भन्दै यसका प्रदेश सरकारको सहयोगको अपेक्षा गरिएको बताए ।
गणेशबहादुर भट्टराईको नेतृत्वमा पोखरा पर्यटन परिषदका अध्यक्ष गोपीबहादुर भट्टराई, धर्मेन्द्रकुमार बाटाजु, अशोककुमार भण्डारी, जीवन भट्टराई, विकास भट्टराई, विशेष थापा, जयराम तिमिल्सिना, सुनिलबहादुर भट्टराई, अमित थापा, सरोज भट्टराई, च्यामबहादुर गुरुङ र अमृत ढकाल हालै कांग्रेसमा प्रवेश गरेका हुन् । उनीहरु सबैलाई प्रधानमन्त्री निवास बालुवाटारमा गत साता आयोजित कार्यक्रमका पार्टी सभापति एवं प्रधानमन्त्री शेरबहादुर देउवाले सदस्यता प्रदान गरेका हुन् ।
