दाङ । गएराति दाङमा बाढीले गाडी बगाउँदा एकै घरमा दुई दिदी बहिनीसहित चार जनाको मृत्यु भएको छ ।
घोराही लमही सडक खण्डको घोराही उपमहानगरपालिका–४ सिस्ने खोलामा आएको बाढीले प्रदेश ०३– ०१–०२४ च ४४४० नम्बरको कारलाई बगाउदा चार जनाको मृत्यु भएको हो ।
दाङका प्रमुख जिल्ला अधिकारी रामबहादुर कुरुम्वाङका अनुसार घोराही १३ की ३२ वर्षीया सुशीला श्रेष्ठ, घोराही १४ की ३० वर्षीया राधा श्रेष्ठ कुँवर, घोराही–१३ की ४० वर्षीया रीता माया पुन र घोराही–१४ का ४२ वर्षीया बिमला केसीको मृत्यु भएको हो । चालकलाई भने प्रहरीले उद्धार गरेको छ ।
रुपैडैयाँ किनमेल गरेर फँर्कदै गर्दा गाडीलाई बाढीले बगाएको थियो ।
मृतक राधा र सुशीला घोराही उपमहानगरपालिका वडा नम्बर १६ का सदस्य जगत श्रेष्ठका छोरीहरू हुन् । चालक घोराही–१५ का ४० वर्षीय नरबहादुर पुनको खुट्टा भाँचिएको र राप्ती स्वास्थ्य विज्ञान प्रतिष्ठानमा उपचार भैरहेको छ ।
