काठमाडौँ । नेपाली फुटबल टिमका पूर्वकप्तान किरण चेम्जोङले माल्दिभ्समा लिग उपाधि जितेपछि आफ्नी प्रेमिकालाई मैदानमै औँठी लगाइदिएर आफ्नो प्रेम दर्शाएका छन् । प्रतियोगिताभर उत्कृष्ट प्रदर्शन गरेका उनले फाइनल जितपछि विशेष तरिकाले खुशियाली मनाए । उनले उपाधि जितेपछिको सेलिब्रेसनमा आफ्नी प्रेमिका कञ्चन निरौलालाई पनि सहभागी गराए ।
उपाधिसहित टिमले फोटोसेसन गर्ने क्रममा किरणले प्रेमिका कञ्चनलाई हात समातेर लगेका थिए । त्यसपछि उनले रोमाञ्टिक शैलीमा एउटा घुँडा टेकेर कञ्चनलाई औँठी लगाइदिएर बिहेको प्रस्ताव गरे । टिमको अगाडि नै किरणले यसरी प्रेम दर्शाउँदा कञ्चन निकै लजाएकी थिइन् । लामो समयदेखिको किरण र कञ्चनको प्रेमले सोमबारदेखि औपचारिकता पाएको छ ।
किरण सहभागी माजिया स्पोट्र्स एन्ड आरसीले माल्दिभ्सको धिवेही प्रिमियर लिग उपाधि जितेको थियो । सोमबार भएको फाइनल खेलमा क्लब इगल्सलाई ५–० ले हराउँदै माजिया लिग च्याम्पियन बनेको हो । माजियाको जितमा महत्वपूर्ण भूमिका खेलेका किरणले यस सिजनकै सर्वोत्कृष्ट गोलकिपरको उपाधि पाए ।
