काठमाडौं । पूर्वअर्थमन्त्री जनार्दन शर्मामाथि छानबिन गर्न गठित संसदीय छानबिन विशेष समितिको प्रतिवेदन प्रतिनिधि सभामा पेस भएको छ ।

शुक्रवार बसेको प्रतिनिधि सभाको दोस्रो बैठकमा संसदीय छानबिन विशेष समितिको प्रतिवेदन २०७९ समितिका सभापति लक्ष्मणलाल कर्णले पेस गर्नुभएको हो ।

तत्कालिन अर्थमन्त्री जनार्दन शर्माले आर्थिक वर्ष २०७९/०८० को बजेट निर्माणका क्रममा जेठ १४ गते राति अनाधिकृत व्यक्तिहरु प्रवेश गराइ करका दर हेरफेर गराएको भन्दै समाचार बाहिरिएपछि प्रतिनिधि सभाले असार २२ गते संसदीय छानबिन विशेष समिति गठन गरेको थियो । समितिले निर्धारित १० दिनमा काम सम्पन्न नगरेपछि साउन ५ गते थप ७ दिन समय थप गरिएको थियो ।

थप समयभित्र समितिले अर्थ मन्त्रालयबाट कागजात मगाइ अध्ययन गरेको तथा सम्बन्धित पदाधिकारीहरुसँग छलफल गरेको सभापति कर्णले जानकारी दिनुभयो । उहाँले नेपाल प्रहरीको डिजिटल फरेन्सिक ल्याबबाट प्राप्त भएको प्रतिवेदन र सिसिटिभिको रिकभर भएका क्लिपसहितका कागजातहरु र प्रमाण विश्लेषण गरी प्रतिवेदन तयारी गरिएको बताउनु भयो ।

उहाँले भन्नुभयो – ‘थप गरिएको समयभित्र समितिले अर्थ मन्त्रालयबाट प्राप्त कागजात, पदाधिकारीहरुसँगको छलफल, नेपाल प्रहरीको डिजिटल फरेन्सिक ल्याबबाट प्राप्त प्रतिवेदन र रिकभर भएका क्लिप लगायत कागजातहरु र प्रमाणका विश्लेषण गरी यो प्रतिवेदन तयार गरिएको छ ।’

छानबिन समितिमा खगराज अधिकारी, देवप्रसाद गुरुङ, पुष्पा भुसाल गौतम, प्रदीपकुमार ज्ञवाली, भानुभक्त ढकाल, विमला वि.क., लक्ष्मणलाल कर्ण, शक्तिबहादुर बस्नेत, सरलाकुमारी यादव, सिताराम महतो, सुरेन्द्रप्रसाद यादव रहनुभएको थियो । पुष्पा भुसाल गौतम उपसभामुख निर्वाचित भएपछि भने सो ठाउँमा मानबहादुर विश्वकर्मालाई राखिएको थियो ।

समिति सभापति कर्णले समितिको २३ वटा बैठक बसेको बताउनु भयो । प्रतिनिधि सभाको अर्को बैठक साउन १७ गते मंगलवार दिनको १ बजे बस्नेगरी बोलाइएको छ ।

यो पनि पढ्नुहोस्ः संसदीय छानबिन समितिले बुझायो प्रतिवेदन (पूर्णपाठ)