काठमाडौंः प्रधानमन्त्री शेर बहादुर देउवासँग नेपाल भ्रमणमा रहनु भएका अमेरिकी सहायक विदेशमन्त्री डोनाल्ड लुले प्रधानमन्त्री निवास बालुवाटारमा आज अपराह्न भेट गर्नु भएको छ ।
भेटका अवसरमा उहाँहरुबीच नेपाल अमेरिकाबीच रहेको जनस्तरको सम्बन्धलाई थप प्रगाढ बनाउने तथा दुई देशबीचको सहयोगका विविध पक्षमा कुराकानी भएको नेपालस्थित अमेरिकी दूतावासले जनाएको छ ।
आजै सहायक विदेशमन्त्री लू ले परराष्ट्र मन्त्री डा नारायण खड्कासँग भेटवार्ता गर्नु भएको थियो । दुई नेताबीच विकास साझेदारी, आर्थिक सहयोग, खाद्य सुरक्षा र कोभिड खोप सहयोगका बारेमा छलफल भएको मन्त्रालयले जनाएको छ ।
त्यस अवसरमा प्रधानमन्त्री देउवाले नेपालको विकास प्रयासमा अमेरिकाले निरन्तर प्रदान गरिआएको सहयोगका लागि धन्यवाद दिँदै आगामी दिनमा पनि अमेरिकी सहयोग निरन्तर रहने विश्वास व्यक्त गर्नु भएको थियो ।
सहायक मन्त्री डोनाल्ड लु बिहीबार नेपाल भ्रमणमा आउनुभएको हो ।
यसअघि पनि गत मङ्सिरमा नेपालको भ्रमण गरिसक्नुभएका उहाँले यो पटकको भ्रमणमा विभिन्न व्यावसायिक, नागरिक तथा सरकारी नेतृत्वसँग नेपाल–अमेरिका बीचको ७५ वर्षे लामो मित्रताका विविध आयामलगायत विषयमा कुराकानी गर्नुहुने नेपालस्थित अमेरिकी दूतावासले जनाएको छ ।
दक्षिण एशियाली मामिलाका सबैभन्दा उच्च तहका अमेरिकी कूटनीतिज्ञका रुपमा विविध विषयमा छलफलका लागि उहाँले यस क्षेत्रको भ्रमण गर्नुभएको हो ।
