काठमाडौँ । नेपालमा बाघको संख्या ३५५ पुगेको छ । प्रधानमन्त्री शेरबहादुर देउवाले विश्व बाघ दिवसको अवसर पारेर सार्वजनिक गर्नुभएको चौथो राष्ट्रिय बाघ गणनाको नतिजाअनुसार पछिल्लो चार वर्षमा बाघको संख्या १२० ले बढेको छ । सन् २०१८ मा नेपालमा २३५ वटा बाघ थिए ।
सार्वजनिक नतिजामा सबैभन्दा धेरै चितवन राष्ट्रिय निकुञ्जमा १२८ वटा बाघ रहेका छन् । त्यस्तै बर्दिया राष्ट्रिय निकुञ्जमा १२५, पर्सामा ४१, शुक्लाफाँटामा ३६ र बाँकेमा २५ वटा बाघ गणना भएका छन् । गत मंसिर १९ गतेदेखि सुरु भएर फागुन २८ गतेसमम बाघ गणना सम्पन्न भएको थियो ।
सन् २०१० मा रुस को सेन्ट पिटर्सवर्गमा बाघ पाइने देशहरूले दोब्बर बनाउने संकल्प गर्दै महत्त्वपूर्ण निर्णय गरेका थिए । नेपालले पनि सन् २०२२ सम्ममा बाघको संख्या दोब्बर बनाउने संकल्प गरेको थियो । तर समयावधिभन्दा अघि नै नेपालले आफ्नो संकल्प पूरा गरेको छ । सन् २०१० मा नेपालमा बाघको संख्या १२१ थियो ।
