किभ । रूसी सेनाले पूर्ण मात्रामा आक्रमण गरेपछि शुक्रबार बिहान युक्रेनको राजधानी किभमा विस्फोटको आवाज सुनिएको छ । रुसी सेनाको आक्रमणमा पहिलो दिन बिहीबार कम्तिमा १३७ युक्रेनीको मृत्यु भएको थियो।
युद्धको दोस्रो दिनमा प्रवेश गर्दा किभमा भएको आक्रमणलाई रुसी राष्ट्रपति भ्लादिमिर पुटिनले युक्रेनी सरकारलाई ध्वस्त पार्ने र त्यसको स्थानमा आफ्नै शासन स्थापना गर्ने निर्लज्ज प्रयास भएको पश्चिमी अधिकारीहरूले आशङ्का गरेका छन्।
युक्रेनका विदेशमन्त्री दिमित्रो कुलेबाले शुक्रबार बिहान राजधानी किभलाई हल्लाउने ‘भयानक रकेट हमला’का लागि रूसको निन्दा गर्नुभयो।
युक्रेनी राष्ट्रपति भोलोडिमिर जेलेन्स्कीले शुक्रबार रूसी ‘सबोटाज समूहहरू’ किभमा प्रवेश गरेको भन्दै आफ्ना नागरिकहरूलाई सतर्क रहन आग्रह गर्नुभयो ।
जेलेन्स्कीले स्थानीय समयअनुसार शुक्रबार बिहान सबेरै एक सामान्य परिचालनको घोषणा गर्नुभयो र आक्रमणकारी रुसी सेनाहरूसँग लड्न राष्ट्रव्यापी सेना र रिजर्भिस्टहरूलाई बोलाउनुभयो।
उहाँले युद्धको पहिलो दिनमा सेना र नागरिक गरी १३७ युक्रेनी मारिएको र ३१६ घाइते भएको जानकारी दिनुभयो ।
रुसी सेनाले बिहीबार युक्रेनी सेनामाथि देशभरका सैन्य प्रतिष्ठानहरू नियन्त्रण गर्नका लागि आक्रमण गरे ।
रुसी सेनाले युक्रेनमा ११ एयरफिल्डसहित ७४ सैन्य सुविधा नष्ट गरेको दावी गरेको छ । एक युक्रेनी अधिकारीका अनुसार रुसी सेनाले किभबाट ९० किलोमिटर उत्तरमा रहेको चेर्नोबिल पूर्वआणविक उर्जा केन्द्र कब्जा गरेको छ।
युक्रेनी राष्ट्रपति जेलेन्स्कीले ‘नयाँ फलामको पर्दा’ ले रूसलाई बाँकी संसारबाट अलग गरेको भन्दै आक्रमणको प्रतिरोध गर्ने वाचा गरेका छन्। एजेन्सीको सहयोगमा
