काठमाडौँ । विश्वचर्चित फेसन म्यागजिन भगले नेपालकी सुपरमोडल अञ्जली लामालाई कभर पेजमा स्थान दिएको छ । भागको कभर पेजमा स्थान पाउने उनी दोस्रो नेपाली हुन् ।
प्रख्यात फेसन डिजाइनर प्रबल गुरुङलाई पनि भगले यसअघि कभर पेजमा स्थान दिएको थियो । अल्पसंख्यक लैंगिक समुदायको प्रतिनिधित्व गर्दै मोडलिङ गर्दै आएकी अञ्जलीलाई भगको भारतीय संस्करणको अगस्ट महिनाको कभरमा देख्न सकिनेछ ।
फेसनकर्मीका लागि भगको कभरमा आउनु ठूलो सपनाको कुरा हो । अञ्जलीले न्युयोर्क फेसन विककमा र्याम्पमा पनि सहभागी भएकी छन् । उनले हलिउड र बलिउडको संयुक्त लगानीमा निर्माण भएको एक फिल्ममा पनि अभिनय गरेकी छन् ।
भगको कभर स्टोरीमा ‘लामाको व्यक्तिगत र व्यावसायिक यात्राको कथा विश्वले थाहा पाउनु जरुरी छ’ भनिएको छ । अल्पसंख्यक लैंगिक समुदायबारे चेतना फैलाउन फेसनले उत्कृष्ट माध्यमको रुपमा काम गर्न सक्ने अञ्जलीले बताएकी छन् ।
