झापा । झापाको कचनकवल गाउँपालिकामा एउटै रुखमा तीन जना किशोरी झुण्डिएको अवस्थामा फेला परेका छन् ।
कचनकवल–५ स्थित पाठामारीको बेल्लेगाउँको सुनकोसी चिया बगानमा ती किशोरी एउटै रुखमा झुण्डिएको अवस्थामा फेला परेका हुन् । झापा प्रहरी कार्यालयका प्रहरी नायब उपरीक्षक बसन्त पाठकका अनुसार बयरको रुखको एउटै हाँगामा दुई किशोरी र अर्को हाँगामा अर्की किशोरी झुण्डिएको अवस्थामा फेला परेका हुन् ।
सामूहिक आत्महत्या गर्ने तीन जना किशोरी स्थानीयवासी हुन् । उनीहरु कचनकवल–५ निवासी पंचम गणेशकी १६ वर्षीया छोरी करिना, पुवालु गणेशकी १७ वर्षीया छोरी अञ्जली र वीरबल गणेशकी १६ वर्षीया कल्पना रहेका छन् ।
शनिबार दिउँसोदेखि बेपत्ता भएका उनीहरु आइतबार बिहान साढे ७ बजे झुण्डिएको अवस्थामा फेला परेका हुन् । स्थानीयवासीले देखेपछि उनीहरुले प्रहरीलाई खबर गरेका थिए ।
तीनैजना किशोरी सोही चिया बगानमा काम गर्ने गर्थे । उनीहरुले सामूहिक आत्महत्या गर्नुको कारण अहिलेसम्म खुल्न सकेको छैन ।
