काठमाडौं । संस्कृति पर्यटन तथा नागरिक उडड्यन मन्त्री जीवनराम श्रेष्ठले पर्यटन क्षेत्रमा देखिएका विकृतिलाई सरकार र निजी क्षेत्र मिलेर नियन्त्रण गर्न जरुरी रहेको बताउनुभएको छ ।
सोमवार पर्यटन मन्त्रालयमा भएको सरोकारवाला निकायहरुसँग पर्यटन क्षेत्रको पुनरुत्थानबारेमा अन्तरक्रिया कार्यक्रममा बोल्दै मन्त्री श्रेष्ठले यस्तो बताउनुभएको हो । उहाँले पर्यटन क्षेत्रमा विभिन्न विकृति बढ्दै गएको गुनासो आउने गरेको भन्दै निजी क्षेत्रसँग हातेमालो गरेर विकृति नियन्त्रण गर्ने योजना रहेको बताउनु भयो । पर्यटन मन्त्री श्रेष्ठले नेपालको पर्यटन क्षेत्रको पुनरुत्थापन गर्नको लागि तत्काल गर्न सकिने मध्ये कालमा गर्नुपर्ने र दीर्घकालमा गर्नुपर्ने कामका विषयमा अध्ययन गरेर काम अगाडि बढाउने उल्लेख गर्नुभयो ।
उहाँले पर्यटन क्षेत्रको पुनरुत्थानको काम सरकार र निजी क्षेत्र मिलेर मात्रै व्यवस्थित गर्न सकिने दाबी गर्नुभयो । मन्त्री श्रेष्ठले तत्काल समय सापेक्ष अनुसारको ऐन नियमलाई संशोधन गरेर काम अगाडि बढाउने पनि तयारी भइरहेको बताउनु भयो । उहाँले आफू लामो समय बस्ने मन्त्री नभएको भन्दै ऐन कानून निर्माण गर्नभने लागिपर्ने बताउनु भयो ।
उहाँले भन्नुभयो,‘ कोरोना महामारीबाट प्रभावित पर्यटन क्षेत्रको विकासका लागि तत्काल गर्न सकिने ,मध्येकालमा गर्नुपर्ने र दीर्घकालमा गर्नुपर्ने काम हेरेर गर्नेछौं । ऐन नियम बनाउने काम केही समय लाग्छ । ऐन कानूनको कामको पनि शुरुवात गरौं भनेर सोचेको छौं । म लामो समय बस्ने मन्त्री होइन । तर शुरुवात गरेपछि भोलि निरन्तरता पाउँछ र एउटा निस्कर्ष निस्कन्छ । शुरु नै भएन भने अगाडि बढ्दैन । ऐन नियमका कुराहरु कहाँ केकेमा समय सापेक्ष संशोधन गर्नु पर्नेछ । त्यो कामको शुरुवात गर्छु ।
पर्यटन क्षेत्रलाई पुनःस्थापित र प्रचार गर्नुपर्ने कुराहरु छन् । त्यसमा मन्त्रालय कार्यक्रम नै अगाडि बढाएर जानेछ । पर्यटन पुनरुत्थानको काम सरकार र निजी क्षेत्र मिलेर नै गर्ने हो । हातेमालो गरेर नै पर्यटन क्षेत्रलाई व्यवस्थित गर्ने हो । पर्यटन क्षेत्रमा देखिएका विकृतिका कुराहरु पनि सुन्नमा आएका छन् । मैले थाहा पाए अनुसार यो क्षेत्रमा धेरै विकृतिहरु बढ्न थालेको छ जसले गर्दा हाम्रो इमेज खराब हुँदै गएको छ । यो विकृति नियन्त्रण गर्ने कुरामा पनि निजी क्षेत्रको सहयोगको आवश्यकता रहेको छ ।’
त्यस्तै कार्यक्रममा ट्रेकिङ एजेन्सिज एशोसिएशन अफ नेपाल (टान) का अध्यक्ष खुमबहादुर सुवेदीले पर्यटन बोर्डले नेपालको पर्यटन क्षेत्रका सबै प्याकेजहरुलाई अनलाइन प्रणालीमार्फत प्रचारप्रसार गर्ने सुझाव दिनुभयो । उहाँले ट्राभल एजेन्सीमार्फत पर्यटन गन्तव्यहरुको ब्रोसरहरु बोकेर,हवाइ उडानमा खर्च गरेर अहिलेको आधुनिक र टेक्नोलोजीको समयमा जानुपर्ने उपयुक्त नहुने दाबी गर्नुभयो । अध्यक्ष सुवेदीले विदेशी पर्यटक नेपाल आएर नेपालका पर्वतीय र पदयात्रा जाँदा टे«किङ कम्पनीहरुको माध्यमबाट मात्रै पर्वतीय र पदयात्रा सञ्चालन हुनुपर्ने जिकिर गर्नुभयो ।
उहाँले भन्नुभयो,‘ अहिले स्पेन र जर्मनदेखि बाहेक अन्य देशहरुमा प्रचार गर्नुपर्ने देख्दिन । यसको लागि नेपाल पर्यटन बोर्डले दत्तचित्त भएर आफ्नो निर्णयमा एउटा आइटी टिम राखेर अनलाइनबाट पर्यटन क्षेत्रका प्रोडक्टहरुलाई प्रकाशित र प्रचार गर्नुपर्ने देखिन्छ । हामी ट्राभलहरुबाट हाम्रा ब्रोसरहरु बोकेर,हवाइ उडानमा खर्च गरेर आधुनिक र टेक्नोलोजीको समयमा जानुपर्ने उपयुक्त देखिँदैन । अनलाइनबाट नेपालका पर्यटन क्षेत्रका प्रोडक्टहरु सो गर्न सकिन्छ । हामीले विदेशी पर्यटक नेपाल आएर नेपालका पर्वतीय र पदयात्रा जाँदा टे«किङ कम्पनीहरुको माध्यमबाट मात्रै पर्वतीय र पदयात्रा सञ्चालन होस् ।’
त्यस्तै, होटल एसोसिएसन अफ नेपाल (हान) की अध्यक्ष सिर्जना राणाले राज्यले पर्यटन उद्योगलाई कहिल्यै राष्ट्रिय प्राथमिकता नराखेको गुनासो गर्नुभयो । उहाँले सरकारले अन्य उद्योगको तुलनामा राष्ट्रिय प्राथमिता नपरेर सहुलियत तथा छुट समेत नपाउँदा उद्योग धरासाही बनेको दाबी गर्नुभयो । अध्यक्ष राणाले सरकारले पर्यटन उद्योगलाई मौद्रिक नीतिमार्फत सहुलियत तथा अनुदानको व्यवस्था गरे मात्रै पर्यटन उद्योगलाई ठूलो सहयोग पुग्ने बताउनु भयो । उहाँले सरकारले नेपालको राम्रो सन्देश दिनको लागि पाँच तारेदेखि सबै होटलमा खानामा गुणस्तरियता कायम गराउनु पर्ने सुझाव दिनुभयो । अध्यक्ष राणाले नेपालका पर्यटक ल्याउनको लागि अझै चुनौती रहेको बताउनु भयो ।
उहाँले भन्नुभयो,‘२०१९ मा १२ लाख पर्यटक नेपालमा भित्रिए नेपालमा भने अहिले २०२२मा जुनसम्म २.३७ भन्दा अहिले पनि डाटाले पर्यटन भित्र्याउन चुनौती धेरै रहेको छ । त्यसकारण चालु आर्थिक वर्षको मौद्रिक नीतिमार्फत पर्यटन उद्योग संरक्षण गर्नु आवश्यक छ । नेपाल सरकारले पर्यटन उद्योगलाई राष्ट्रिय प्राथमिकता दिएको छैन । जुन उद्योग कोरोना महामारीले माथि उठ्न सकेको छैन । त्यो उद्योगलाई अन्य उद्योगको तुलनामा सहुलियत केही पनि छैन । पर्यटन उद्योगलाई केही सहुलियत भएमा ठूलो सहयोग हुने थियो । होटलको क्षेत्रमा पाँच तारे वा जुन सुकै होस् त्यहा सुरक्षा र खानेकुरामा गुणस्तरियता भए/नभए राम्रो सन्देश जाँदैन । त्यसैले खाद्यायमा गुणस्तरीय हुनु आवश्यक छ । नेपाल एयर लाइन्सलाई प्राथकिता दिनु जरुरी छ ।’
त्यस्तै कार्यक्रममा नेपाल पर्वतारोहण संघ (एनएमए) का अध्यक्ष सन्तवीर लामाले पर्वतारोहण उद्योगलाई राष्ट्रिय उद्योगको रुपमा स्थापना गर्न सुझाव दिनुभयो । उहाँले पर्वतारोहण सम्बन्धि सेवा सुविधाहरु एकद्वार प्रणालीमार्फत दिनुपर्ने बताउनु भयो । अध्यक्ष लामाले शाहसिक विभिन्न खेलहरुको लागि हिमालय आरोहण समेत खुल्ला गर्न माग गर्नुभयो । उहाँले हिमाल आरोहण गर्दा ज्यान गुमाउनेको परिवारलाई कल्याणकारी कोष सञ्चालन गर्ने नितिगत व्यवस्था गर्नुपर्ने बताउनु भयो ।
त्यस्तै,नेपाल एशोसिएशन अफ टुर एण्ड ट्राभल एजेन्ट्स (नाट्टा)का अध्यक्ष रमेश थापाले पर्यटकको लागि काठमाडौंमा विगत लामो समयदेखि पर्यटक बसपार्कको अभाव भएकाले सरकारले पर्यटक बसपार्कको व्यवस्थापन तत्काल गर्नुपर्ने बताउनु भयो ।
कार्यक्रममा समग्र पर्यटन व्यवसायीहरुले नेपालको पर्यटन क्षेत्र पुनरुत्थानको लागि सरकारले गर्नुपर्ने विभिन्न काम गर्नको लागि सुझाव दिनुभएको थियो ।
