काठमाडौँ । नेपालको भ्रमणमा रहनुभएका चिनियाँ कम्युष्टि पार्टीका विदेश विभाग प्रमुख लिउ जियानचाओले विद्यार्थीहरुलाई खाना पस्किएर खुवाउनुभएको छ । काठमाडौँ दरबार छेउको शान्ति निकुञ्ज माध्यमिक विद्यालयमा पुगेर उहाँले विद्यार्थीहरुलाई खाना पस्किनुभएको हो ।
उच्च तहको भेटघाटमा व्यस्त लिउ नेपाल भ्रमणको दोस्रो दिन भ्रमण टोलीका केही सदस्यसहित विद्यालय पुग्नुभएको थियो । लिउसँगै त्यहाँ पुग्नुभएकी ऊर्जामन्त्री पम्फा भुसालले ‘लन्च सेरेमोनी अफ नेपाल स्माइलिङ चिल्ड्रेन प्रोजेक्ट’ कार्यक्रमको उद्घाटन गर्नुभएको थियो ।
कक्षा कोठामा दाल, भात र तरकारी पाक्दै गर्दा बाहिर सुरक्षाकर्मीको बाक्लो उपस्थिति थियो ।
कार्यक्रममा लिउले चिनियाँ बालबालिका र नेपाली बालबालिकालाई साथी बनाउने इच्छा रहेको बताउनुभयो । लगत्तै हातमा पन्जा लगाएर पाकिरहेको दाल, भात र तरकारी पस्किनुभयो ।
ऊर्जामन्त्री भुसालले सो कार्यक्रमबारे ट्विट गर्दै काठमाडौँको शान्ति निकुञ्ज माध्यमिक विद्यालयका विद्यार्थीलाई खाना खुवाएर ‘स्माइलिङ चिल्ड्रेन’ परियोजनाको शुरुआत गरेको बताउनुभएको छ ।
उहाँले नेपाल भ्रमणमा रहनुभएका चिनियाँ कम्युनिस्ट पार्टी (सीपीसी) का विदेश विभाग प्रमुख ज्लिउ जियानचाओको नेपाल बसाइ सुखद् रहोस भनी शुभकामना दिनुभएको छ ।
