काठमाडौं । सत्तारुढ गठबन्धन जनता समाजवादी पार्टी (जसपा) का शीर्ष नेताहरुसँग अमेरिकी सहयोग मिलिनियम च्यालेन्ज कर्पोरेशन(एमसीसी) की उपाध्यक्ष फातिमा सुमारले भेटघाट गरेकी छिन् ।
जसपाका अध्यक्ष उपेन्द्र यादव र पूर्व प्रधानमन्त्री एवं जसपा संघीय परिषद् अध्यक्ष डा. बाबुराम भट्टराईसँग बिहीबार साँझ फातिमाले भेटघाट गरेकी हुन् ।
भेटघाटका क्रममा फातिमाले एमसीसीबारे जसपाको आधिकारिक धारणाबारे चासो राखेकी थिइन् ।
छलफलका क्रममा उनीहरुले प्रमुख दलहरुसँग छलफल गरेर आवश्यक निर्णय लिने जवाफ दिएको बताइएको छ ।
त्यस्तै बिहान फातिमाले पूर्वप्रधानमन्त्री एवं सत्तारुढ गठबन्धन माओवादी केन्द्रका अध्यक्ष पुष्पकमल दाहाल ‘प्रचण्ड’ सँग भेटघाट गरेकी छिन् ।
चारदिने भ्रमणका लागि बिहीबार नेपाल आइपुगेकी फातिमाले बिहीबार नै पूर्वप्रधानमन्त्री एवं एमाले अध्यक्ष केपी शर्मा ओली र पूर्व प्रधानमन्त्री एवं एकीकृत समाजवादीका अध्यक्ष माधवकुमार नेपालसँग भेटघाट गरेकी थिइन् ।
आज नै उनले प्रधानमन्त्री शेरबहादुर देउवा र अर्थमन्त्री जनार्दन शर्मालाई समेत भेट्दैछिन् ।
