काठमाडौं । प्रधानमन्त्री शेरबहादुर देउवा समक्ष माओवादी अध्यक्ष प्रचण्ड र नेकपा एसका अध्यक्ष माधव नेपालले आजैको संसद बैठकबाट एमसिसी पासन गर्ने वातावरण बनाउने आस्वासन हिजो दिएका छन् । हिजो राति उनीहरु दुवैजना बालुवाटार पुगेर प्रधानमन्त्री देउवालाई पो प्रतिबद्धता व्यक्त गरेका हुन् । हिजो नै प्रधानमन्त्री र एमाले अध्यक्ष ओलीबीच बालकोटमा भेटवार्ता हुने भएको थियो । तर बालकोटका लागि बालुवाटारबाट देउवा निस्किनै लाग्दा प्रचण्डले देउवालाई फोन गरर अब एमसिसीका लागि एमालेको सहयोग खोज्नु नपर्ने र पास गर्नका लागि आफूहरु तयार भएको बताएपछि देउवा बालकोट गएका थिएनन् ।
त्यसपछि कांग्रेस उपसभापति पूर्णबहादुर खड्काको नेतृत्वमा कांग्रेसका केही नेता बालकोट पुगेका थिए । त्यस लगत्तै नेताहरु प्रचण्ड र नेपाल बालुवाटार पुगे र गठबन्धन भत्कन नदिने सर्तमा एमसिसी पारित गराउने निष्कर्ष सुनाए । तर देउवाको मनको डर अझै हटेको छैन । किनभने यसअघि बिहीबारको बैठकमा निर्णयार्थ प्रस्तुत गरेर संसदले एमसिसी अस्विकृत गरेको निर्णय सुनाउने माओवादी चालबाजी थाहा पाएर नै प्रधानमन्त्रीले संसद बैठक रोक्न आग्रह गरेका थिए । त्यही खतरा अहिले पनि देउवाले देखेका छन् । त्यसैले अहिले देउवा प्रचण्ड र माधव नेपालबाट लिखित प्रतिबद्धता खोजेका छन् ।
आज बिहान उनीहरुबीचमा बस्ने कुरा भएको छ । त्यसअघि दुई पार्टीले आफ्ना आन्तरिक बैठक बोलाएर यस विषयमा छलफल गराई लिखित प्रतिबद्धता तयार पार्नेछन्– कांग्रेसको समाचार स्रोतले भन्यो । सो स्रोतको दाबी छ– प्रधानमन्त्रीजीले लिखित प्रतिबद्धता खोज्नुभएको छ, नत्र माओवादीको अस्तिको जस्तो चालबाजी हुनसक्छ, हामीले निर्णयार्थ प्रस्तुत गर्न दिँदैनौँ । यदि माओवादीहरुले सही रुपमै एमसिसी पारित गर्ने हो भने अर्थमन्त्रीले नै यो प्रस्ताव संसदमा प्रस्तुत गर्नुपर्छ । होइन र उनी अस्तिजस्तै भाग्दै हिँड्ने हो भने पनि माओवादीले स्वीकार नगर्ने कांग्रेसको अडान छ । सो स्रोतले भन्यो– नत्र गठबन्धन तोडेर एमालेसँग सहकार्य गर्न हामी तयारै छौँ, अहिले त माधव प्रचण्डको अनुरोधले नै एमालेसँग सम्झौता रोकिएको हो ।
