नयाँ दिल्ली । भारतीय जनता पार्टी (भाजपा) ले झारखण्डकी पूर्वगभर्नर द्रौपदी मुर्मूलाई राष्ट्रपतिको प्रत्याशी बनाएको छ । अघिल्लो पटक राष्ट्रपति निर्वाचनमा भाजपाले बिहारका तत्कालीन गभर्नर रामनाथ कोविन्दलाई आफ्नो तर्फबाट राष्ट्रपतिको उम्मेदवार बनाएको थियो ।
द्रौपदी मुर्मू झारखण्डको पहिलो महिला र आदिवासी गभर्नर थिइन्। यहाँबाट सेवानिवृत्त भएपछि उनी आफ्नो गृह राज्य ओडिशाको मयुरभञ्ज जिल्लाको रैरङपुरमा बस्छिन्। यो उनको मूल गाउँ बैदापोसीको ब्लक मुख्यालय हो। उनी सबैभन्दा लामो समय (छ वर्षभन्दा अलि बढी) झारखण्डको गभर्नर थिइन्।
द्रौपदी मुर्मू भारतको पहिलो आदिवासी र दोस्रो महिला राष्ट्रपति बन्न सक्छिन्। उनी नेसनल डेमोक्रेटिक एलायन्स (एनडीए) उम्मेदवार हुन् र एनडीए भोटको हिसाबले जितको नजिक छ ।
विपक्षी दलहरुले यशवन्त सिन्हालाई राष्ट्रपति पदमा उम्मेदवार बनाएका छन् । यशवन्त सिन्हा पूर्व भारतीय प्रशासनिक सेवा (आईएएस) अधिकारी, झारखण्डको हजारीबाग सीटबाट भाजपा लोकसभा सांसद र केन्द्र सरकारको मन्त्री पनि भइसकेका छन्।
उनी लामो समयसम्म भाजपाको नेता रहे । तर पछिल्ला वर्षहरूमा उनले प्रधानमन्त्री नरेन्द्र मोदीको विरुद्धमा आवाज उठाउन थाले र अन्ततः भाजपा छोड्नुपर्यो।
हाल उनी ममता बनर्जीको पार्टी तृणमूल कांग्रेससँग आवद्ध थिए। उनका छोरा र हजारीबागबाट वर्तमान लोकसभा सांसद जयंत सिन्हा अझै भाजपामा छन्। जयन्त सिन्हाका लागि बुवाको पक्षमा भोट दिने कि पार्टीको पक्षमा जाने भन्ने अन्योल हुनेछ ।
भारतको राष्ट्रपतिको निर्वाचनमा दुवै प्रमुख उम्मेदवार झारखण्डबाट भएको यो पहिलो पटक हो । जसका कारण यो सानो राज्य अचानक चर्चामा आएको छ ।
बीबीसी हिन्दीबाट
