धादिङ । धादिङको धुनिबेशी नगरपालिका वडा नम्बर ६ धार्केमा भारतबाट भन्सार छलेर दुई वटा ट्रकमा ल्याइएको रासायनिक मल किसानले नियन्त्रणमा लिएका छन् ।
भन्सार छलेर ल्याउँदै गरिएको दुई ट्रक मल राजश्व विभागले नियन्त्रणमा लिएको थियो । त्यसपछि व्यापारीहरुको संलग्नतामा किसानहरुलाई जानकारी गराएपछि झन्डै ५ सय जना किसानले पृथ्वी राजमार्गको बिच सडकमै ट्रक रोकेर नियन्त्रणमा लिएका हुन् ।
व्यापारीहरुले केही समयदेखि भन्सार छलीे धादिङका स्थानीय बजारमा मल कालोबजारी गरेर बेच्दै आएको पाइएको छ । विशेष सुराकीको आधारमा राजश्व अनुसन्धान विभागले मल नियन्त्रणमा लिएपछि व्यापारीको संलग्नतामा स्थानीय किसानलाई मल लुट्न लगाएको किसानहरुले बताएका छन् ।
करिब ५ सय बोरा मल किसानले कब्जा गरेर लगिएको बताइएको छ ।
मुलकमा अहिले मल अभाव भइरहेको छ । धान रोप्ने समयमा पनि मल नपाएको भन्दै किसान आक्रोशित भइरहेका अवस्थामा आज धार्केमा किसानले मल कब्जा गरेका हुन् । किसानले मल कब्जा गर्ने क्रममा प्रहरीले भिड तितरवितर पार्न लाठी चार्ज समेत गर्नुपरेको थियो ।
