काठमाडौँ । प्रतिनिधिसभाको बैठक एक घण्टा ढिलो बस्ने भएको छ । आज दिनको १ बजे प्रतिनिधिसभाको बैठक बस्ने कार्यसूची भए पनि २ बजे मात्र बस्ने भएको छ । आजको बैठकमा अमेरिकी सहायता परियोजना एमसीसीमाथि छलफल गर्ने कार्यक्रम रहेको छ ।
यसअघि प्रधानमन्त्री निवास बालुवाटारमा बसेको सत्तारुढ गठबन्धनको बैठकले प्रतिनिधिसभामा टेबल भएको अमेरिकी सहयोग परियोजना एमसीसी आजै पारित गर्ने निर्णय गरेको थियो । बैठकले व्याख्यात्मक टिप्पणीसहित संलग्न हुने गरी एमसीसी सम्झौता अनुमोदन गर्ने निर्णय गरेको हो । यसैबीच प्रमुख प्रतिपक्षी नेकपा (एमाले) ले आज पनि संसद् बैठक अवरोध गर्ने भएको छ ।
एमालेका प्रमुख सचेतक विशाल भट्टराईले एमालेको माग पूरा नभएसम्म संसद् बैठक अवरोधलाई जारी राख्ने बताउनुभयो । एमालेले आफूले कारवाही गरेका १४ जना सांसद्माथि सभामुखले कारवाही नगरेकाले संसद् बैठक अवरोध गर्नुपरेको बताएको छ ।
