काठमाडौँ । नेपाल सरकारले स्टेट पार्टनरसिप प्रोग्राम (एसपीपी) सम्झौतामा हस्ताक्षर गर्न लागेको भन्दै प्रमुख प्रतिपक्षी दल नेकपा (एमाले) ले आपत्ति जनाएको छ ।
प्रतिनिधिसभाको बुधबारको बैठकमा एमालेले अमेरिकाले प्रस्ताव गरेको सो सम्झौतामा हस्ताक्षर गर्न खोजेर सरकारले नेपाललाई भूराजनीतिक द्वन्द्वमा धकेल्न खोजेको आरोप लगायो ।
बैठकको विशेष समयमा बोल्दै एमालेका उपमहासचिव प्रदीपकुमार ज्ञवालीले नेपाललाई भूराजनीतिक द्वन्द्वमा धकेल्ने काम कुनै पनि हालतमा स्वीकार्य नहुने र त्यसलाई एमालेले हुन नदिने बताए ।
नेता ज्ञवालीले छिमेकी र शक्ति राष्ट्रहरुको भिन्न भिन्न स्वार्थ र रणनीति हुने बताए । त्यस्तो स्वार्थ र रणनीतिमा नेपाल साझेदार बन्न नहुने उनको भनाइ थियो ।
सगरमाथा आरोहणका क्रममा एक रुसी आरोहीले सगरमाथाको चुचुरोबाट अर्को मुलुकविरुद्ध झण्डा उचालेको भन्दै उनले सरकारको आलोचना गरे ।
नेपाल र नेपालीको गौरव, पहिचान र शान भएको सगरमाथाको चुचुरोबाट एउटा देशका विरुद्ध झण्डा उचाल्ने कामले सगरमाथालाई पनि रणनीतिक मैदानको थलो बनाउन खोजेको उनको प्रतिक्रिया थियो ।
