काठमाडौँ । लुम्बिनी प्रदेशका स्वास्थ्य राज्यमन्त्री विमला वलीलाई प्रहरीले नियन्त्रणमा लिएको छ । एक महिला र उनकी छोरीलाई कुटपिट गरेको आरोपमा वलीलाई आज बिहान प्रहरीले नियन्त्रणमा लिएको हो।
मंगलबार तुलसीपुर उपमहानगरपालिका–५ बसपार्कस्थित एकराज बस्नेतको घरमा पुगेर राज्यमन्त्री वलीले उनकी श्रीमती र छोरीलाई हातपात गरेकी थिइन् ।
हातपात गरेको खबर पाएपछि स्थानीयले बस्नेतको घरमा उनलाई थुनेर राखेका थिए । पछि प्रहरी आएर उनलाई नियन्त्रणमा लिएको हो । अहिले प्रहरीले घटनाबारे अनुसन्धान गरिरहेको छ ।
राज्यमन्त्री वलीलाई अहिले इलाका प्रहरी कार्यालय तुलसीपुरमा राखिएको छ । कार्यालयमा अहिले कसैलाई पनि छिर्न दिइएको छैन । कार्यालयको सुरक्षा कडा पारिएको छ ।
उनी लु १ झ ५३७ नम्बरको सरकारी गाडी चढेर एकराज बस्नेतको घर पुगेकी थिइन् । घटना हुँदा एकराज घरमा नभएको बताइएको छ ।
एकराजकी श्रीमती मीना भण्डारीले राज्यमन्त्री वलीले उनको घरमा आएर एकराज आफ्नो श्रीमान् भएको दाबी गरेको बताइन् । उनका अनुसार आफू र आफ्नी छ वर्षीया छोरीलाई वलीले हातपात गरेकी थिइन् ।
सो घटनापछि मीनाले आफ्ना जेठाजुलाई खबर गरेको र जेठाजुले प्रहरीलाई खबर गरेका थिए । प्रहरीले राज्यमन्त्री वलीलाई एकराजको घरबाटै नियन्त्रणमा लिएको थियो ।
एकराज र मीनाका एक छोरा र एक छोरी छन् भने वलीका पनि दुई छोरा रहेको बताइएको छ । नेकपा एमालेबाट दाङ ३ खबाट प्रदेशसभा सदस्य निर्वाचित भएका उत्तरकुमार वलीको दुर्घटनामा मृत्यु भएको थियो । त्यसपछि उनी सोही क्षेत्रमा भएको उपनिर्वाचनमा विजयी भएकी थिइन् ।
नेकपा विभाजन भएपछि उनी नेकपा (माओवादी केन्द्र) तिर गएकी थिइन् ।
